اسلام آباد۔ 08 اگست (اے پی پی) وزیراعظم عمران خان زرکارآتے ملک اٹی ساڑی زرکاری نا بے کچ سازگار چاگڑد آن فائدہ ہرفنگ آ زور شاغسا پارینے کہ حکومت زرکار و کاروباری برادری کن ہروڑنا آسراتی فراوان کننگ کن پرعزم ءِ، برآمد آتا مون آ دننگ کن پاکستان اٹی تیار کروک آ مصنوعات آتا بابت خصوصی رعایت تننگ انگ ءِ۔ اوداہیتءِ پنچ شنبے نادے آ پنی آ امریکی کمپنی پراکٹر اینڈ گیمبل نا گلوبل وائس چیئرمین و چیف آپریٹنگ آفیسر جون مولر تون وزیراعظم آفس اٹی اوڑدہی ٹی گپ وتران کرسا پارے۔ اوڑدہی ٹی سلاہکار واپار عبدالرزاق داؤد و چیئرمین زرکاری بورڈ زبیر گیلانی ئسک ہم ساڑی ئسر۔ جون مولر وزیراعظم ءِ پراکٹر اینڈ گیمبل نا پاکستان اٹی زرکاری و کاروباری سرجزآتا بارواٹ سرجم حوال تس۔ پرااینڈ گیمبل کمپنی نا پاکستان اٹی آخبت نا ڈٹ آتیا ہم گپ و تران مس۔ جون مولر وزیراعظم ءِ پارے کہ تدوک آ سی سال آن پراکٹر اینڈ گیمبل کمپنی پاکستان اٹی کٹیا کروک کاروباری سرجز آتے سرانجام تننگ ءِ ہرافتے پین ودفنگک۔ اوپارے کہ کاروباری سرجزآتون اوار اوار پراکٹر اینڈ گیمبل سوشل سیکٹر اٹی ہم تینا پبی کڑد ءِ ادا کننگ ءِ دافتے ٹی کلین اینڈ گرین پاکستان و جان جوڑی و سفائی نا بشخ اٹی پاک صاف پاکستان نمان پروگرام ءُ۔ وزیراعظم پراکٹر اینڈ گیمبل نا کٹیا کروک کاروباری سرجز و کمپنی نا کنڈآن دافتے ٹی پین ودکی اتنگ نا عزم آ است جمی نا درشانی ءِ کرے۔ داوخت آ وزیراعظم عمران خان پارے کہ حکومت زرکار وکاروباری برادری کن ہروڑآسراتی فراوان کننگ کن پرعزم ءِ۔ برآمد آتا غرض اٹ پاکستان اٹی تیار کروک آ مصنوعات آتا رداٹ خصوصی رعایت تننگ انگ ءِ۔ اوپارے کہ 22کروڑنا آبادی آ تالان اسہ بھلو صارف مارکیٹ، ملک انا محل وقوع، ارزاں لیبر و حکومت نا کاروبار موافق کانود وضابطہ زرکاری و کاروباری سرجزآتے پین ودفنگ کن بے کچ جوان ءُ چاگڑد اس فراوان کیک ہرافتیان زرکارآک بایدے پبی فائدہ ہرفر۔
