اسلام آباد۔ 08اگست (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ مقبوضہ کشمیر اٹی بھارت نا ساڑی آ گام گیج آن اِرا نظریہ غاتا نیام اٹ ٹکراؤ ساف مون آ بسنے، ننا نظریہ شون پسند سوچ انا ءِ وخت اس کہ ایلو کنڈامودی نا انتہاپسندانہ، دہشت گردانہ و مسلم کش سوچ انا نظریہ ءِ۔ میڈیا ساڑی آ حالیت آتے ٹی قومی بیانیہ ءِ تالان کننگ کن بایدے مثبت کڑد ادا کے۔ داخیال آتا درشانی ءِ او پنچ شنبے نادے آ پارلیمنٹ ہاؤس اٹی وزارت اطلاعات و نشریات نا بیٹ رپورٹرز آتون خصوصی ہیت وگپ کرسا کرے۔ اوپارے کہ ہراتم قوم ءِ چیلنج آتون مون تروئی تمک تو سیاسی بیانیہ پدی سلک و قومی بیانیہ ءِ اوڑافوقیت دوئی مریک۔ داوخت پاکستان مقبوضہ کشمیر نا ساڑی حالیت آتا سوب آن اسہ اہم ءُ موڑاسے آ سلوک ءِ، حکومت و اپوزیشن ءِ یکجامروئی مریک۔ دامعاملہ غا سیاست کننگ آن کشمیر کاز ءِ نسخان رسینگک۔ اوپارے کہ حکومت پارلیمنٹ نا اسیجائی دیوان اٹی غٹ پارلیمنٹ نا باسک آتے دا معاملہ غا پت اٹی ہلکونے۔ اوپارے کہ دا دیوان آن نن کشمیری الس ءِ دا کلہو تسونن کہ مچ آ پارلیمنٹ و الس کشمیر نا کاز آ اوفتے تون سلوک ءُ ولے اپوزیشن داوخت آ ہم پروڈکشن آرڈر و ذاتیات نا سیاست کرے۔ اوپارے کہ حکومت تینا زمواری تے پورو کننگ ءِ، اپوزیشن ہم تلخ تقریر آتا جاگہ غا راستکی تا بایدے ادراک ءِ کے و ہندن ءُ سیاسی بیانیہ اس جوڑ کننگے ہرا قومی مرے۔ کشمیری تے پاکستان تون اوفتا لازوال رشتہ نا سوب سزا تننگ انگ ءِ۔ کشمیری پاکستان ءِ تینا وجود نا بشخ سر پند کیرہ وخت اس کہ کشمیر پاکستان نا شہ رگ ءِ۔ اوپارے کہ داکان مست کشمیری استصواب رائے نا کمک اٹ تینا حق خودارادیت ءِ خوائسرہ ہرانا پاکستان سیاسی، سفارتی و اخلاقی مخ تفی ءِ کریکہ ولے ساڑی حالیت آتا رداٹ پالیسی ٹی بنداوی بدلی کننگانے۔ داسہ دا تحریک خودارادیت تحریک آجوئی ٹی بدل مسنے۔ دارداٹ ننے تینا آخبت نا پالیسی ءِ جوڑ کروئی ءِ۔ اوپرے کہ دامعاملہ غا میڈیا نا کلیدی ءُ کڑد اسے، غٹ صحافیک محب وطن ءُ۔ اوپارے کہ پاکستان نا بھارت تون تنازعہ بیرہ اِرانظریہ غاتا ٹکراؤ ءِ۔ اسہ کنڈ قائد اعظم نا شون پسند سوچ ءِ وخت اس کہ ایلو کنڈ مودی نا انتہاپسندانہ، دہشت گردانہ و مسلم کش نظریہ ءِ، قیام پاکستان نا وخت ہمووخت انا قیادت قربانی ترسا تینا دتر تے اٹ دالکیر ءِ کشار۔ داٹکراؤ تہذیبی، دودوربیدگی و راجی قدر انا ٹکراؤ ءِ۔ اوپارے کہ میڈیا غا ہندوستانی دودوربیدگ نا یلغار ءِ ہرافتا زہم آک ننا ورناتیا تمرہ۔ اوپارے کہ بھارت ننے سیم تیا شکست تننگ کپک، ننے آلودہ ہندوستانی کلچر آن تینا ورناتے بچفوئی ءِ۔ ہندوستان تون غٹ دودوربیدگی پروگرام، ڈرامہ و فلم آتا بابت رابطہ غاتے چٹفنگ اُن۔ پاکستان نا 65درسد ورناملک انا میرات ءُ، داورناتے قائد اعظم نا نظریہ تون گنڈنہ۔ قیام پاکستان نا وخت ورناک قائد اعظم نا ہر اول دستہ ئسر و سوگوی پاکستان نا تحریک اٹی داورناک”Say No to India” بشخ مریرہ۔ اوپارے کہ قومی سلامتی کمیٹی ٹی مروک آ پیش رفت نا بابت میڈیا ءِ آگاہ تخنگک۔
