اسلام آباد۔ 08 اگست (اے پی پی) بنجائی وزیر ڈٹ بندی، شونداری و اصلاحات مخدوم خسرو بختیار پارینے کہ ساڑی حکومت ملک اٹی توانائی نا گرج آتے پورو کننگ کن اولیتی بنداو تیا گام گیج کننگ ءِ تانکہ الس ءِ اڑزان بجلی مہیا کننگ مرے۔ دابابت حکومت ملک اٹی بجلی نا ٹرانسمیشن لین و گریڈ اسٹیشن تا اپ گریڈیشن آ کاریم کننگ ءِ تانکہ کم وولٹیج کون آ ویل آتا مون ءِ توننگ مرے۔ داخیال آتا درشانی ءِ او سنٹرل ڈویلپمنٹ ورکنگ پارٹی نا دیوان اٹی کرے ہراٹی توانائی نا بابت 3ڈٹ پیش کننگاہرافتے ٹی اولیکو ڈٹ 220کے وی صوابی سب سٹیشن نا جوڑ کننگ کن 5826.09 ملین روپئی نا خڑچ انا پیش کننگا ہرادے دیوان حتمی منظوری کن ایکنک آ گدریفے۔ توانائی نا ارٹ میکو ڈٹ 220 کے وی نوابشاہ سب اسٹیشن نا جوڑ کننگ کن 5769.87 ملین روپئی نا خڑچ انا پیش کننگا ہرادے دیوان حتمی منظوری کن ایکنک آ گدریفے۔ توانائی نا مسٹ میکو ڈٹ ملک انا چندی علاقہ غاتے ٹی 220 کے وی موبائل گریڈ اسٹیشن و ہروڑنا ہڑدڑی حالیت آتون مون تننگ کن 500 کے وی شنٹ ریکٹر نا ہلنگ کن 6246.60 ملین روپئی نا خڑچ انا پیش کننگا ہرادے دیوان حتمی منظوری کن ایکنک آ گدریفے۔
