اقوام متحدہ۔ 08 اگست (اے پی پی) اقوام متحدہ ٹی پاکستان نا آخبتی مندوب ملیحہ لودھی اقوام متحدہ نا سیکرٹری جنرل آن خواست کرینے کہ کشمیر آ اقوام متحدہ نا سلامتی کونسل نا قرارداد آتیا عملدرآمد کن بھارت آ زور شاغے۔ ملیحہ لودھی تدوک آ دے اقوام متحدہ نا سیکرٹری جنرل انتونیوگوتریس نا چیف آف اسٹاف تون اوڑدہی کرے و سیکرٹری جنرل آن خواست کرے کہ مقبوضہ کشمیر نا خصوصی اسٹیٹس ءِ چٹفنگ نا بھارتی گام گیج نا پدی اتنگ نا بابت تینا کڑد ءِ اداکے۔ اوتینا ہم منصب ءِ ڈیہہ نا حالیت آتیا سرجم حوال ہم تس۔ اقوام متحدہ نا سیکرٹری جنرل نا چیف آف اسٹاف ماریا لویزا ریبیروواؤٹی تون اوڑدہی ٹی اوسیکرٹری جنرل اقوام متحدہ نا بابت پارے کہ او نیویارک آن پیشن ءِ ولے او مقبوضہ کشمیر نا آئینی حیثیت ءِ بدل کننگ نابابت بھارت نا ساڑی آ گام گیج آتا توننگ کن تینا کڑد ءِ اداکے۔ اسہ پین جتا ءُ کلہو اسے ٹی انتونیوگوتریس نا ترجمان پارے کہ اقوام متحدہ کڑدہ غاتون جتا کہول آ رابطہ کننگ ءِ ولے اورابطہ غاتا بابت سرجم حوال آتیان معلومدار کتو۔ ملیحہ لودھی سیکرٹری جنرل نا چیف آف اسٹاف ءِ باوری کرفے کہ کشمیر داسہ ہم اقوام متحدہ نا ایجنڈاغا اوارے۔ اوخواست کرے کہ بھارت کشمیر نا بابت ہروڑنا غیر کانودی گام گیج آتیا پاناد کے و اقوام متحدہ نا قرارداد آتیا عملدرآمد ءِ المی کے۔ اومستی پارے کہ بھارت ءِ پین داوڑنا گام گیج آتیان پاناد کروئی مرے ہراقرارداد آتا برعکس مرے۔ اومقبوضہ وادی ٹی انسانی حق انا رکھ ءِ ہم المی کننگ نا خواست کرے۔ داکان بیدس او جاست وپاست کن انکوائری کمیشن اسے نا جوڑ کننگ نا ہم خواست کرے۔ ملیحہ لودھی اقوام متحدہ ٹی برطانوی سفیر کیرین پائیرس و سلامتی کونسل نا ایلو کیہی بے آخبتی باسک آتون ہم اوڑدہی کرے۔ اومقبوضہ وادی نا حالیت آتا بابت جہانی میڈیا نا کیہی نمائندہ غاتون ہم اوڑدہی کرے۔
