اسلام آباد ۔ 7اگست(اے پی پی) راجی سلامتی کمیٹی ءَ بھارتءَ گوں سفارتی سیادی ءَ را کم کنگ، بھارتءَ گوں بیپاری ءِ ہلاس کنگء ُ اے جیڑہءَ را اقوام متحدہ ء ُ سلامتی کونسل ءَ چست کنگءِ فیصلہ کتگ، کمیٹی ءَ کشمیری اُلسءِ حقءَ وت واجہی ءِ جدوجہد ءَ گوں یکوئیءِ درشانی کنگءِ ھاترءَ پاکستانءِ آجوہی ءِ روچءَ را کشمیریکوئی ءِ روچ ء ُ بھارت ءِ آجوہی ءِ روچ 15اگستءَ را سیاہیں روچ گوازینگ ءِ فیصلہ ہم کتگ ۔ راجی سلامتی ءِ کمیٹی ءِ دیوان چارشمبے ءِ روچءَ مز ن وزیر کارگسءَ مزن وزیر عمران خان ءِ سروکی ءَ بوتگ ۔ دیوانءَ دیمپانی ء ِ وزیر ، تہی کارانی وزیر ، دری کارانی وزیر ، وانگء ُ زانگءِ وزیر ، بنی آدمءِ حکانی بنجاہی وزیر ، کشمیرء ُ گلگت بلتستان کارانی بنجاہی وزیر ، قانودءِ وزیر ، مزن وزیر ءِ صلہ کار ، چیئرمین جائنٹ چیفس آف سٹاف کمیٹی، آرمی چیف، پا ک فضائیہ ءِ سروک، نیول چیف، وائس چیف آف نیول سٹاف، مزن وزیرءِ حال ء ُ احیوال کاری ءِ حاسیں کمک کار، ڈائریکٹر جنرل آئی ایس آئی ، آئی ایس پی آرءِ ڈی جی، دری کارانی سیکرٹری ء ُ دگہ سینئر افسر ہواربوتگ اَنت ۔ دیوانءَ بھارتی حکومتءِ یک نیمگی ء ُ غیر قانودی گامگیج ءَ چہ ودی بوتگیں جاورھال ، مقبوضہ جموں ء ُ کشمیر ء ُ کنٹرول لائن ءِ جاورھال ءِ سرءَ چارء ُ بچار کنگ بوتگ ۔ راجی سلامتی ءِ کمیٹی ءَ بھارتءَ گوں سفارتی سیادی ءَ را کم کنگءِ فیصلہ کتگ ۔ کمیٹی ءَ بھارتءَ گوں بیپارءَ ہلاس کنگءِ ہم فیصلہ کتگ ۔ راجی سلامتی ءَ بھارت ءِ گوما دونیمگی انتظامی کارانی سرءَ چمشانک کنگءِ ہم فیصلہ کتگ ۔ راجی سلامتی ءِ کمیٹی ء َ کشمیری اُلسءِ وت واجہیءِ حقءِ بابت ءَ جدوجہد ءَ گوں یکوئیءِ درشانی کنگءِ ھاترءَ 14اگستءِ روچء َ را کشمیرءَ گوں یکوئیءِ درشانی ءِ روچء ُ بھارتءِ آجوہی ءِ روچ 15اگستءَ را سیاہیں روچ گوازینگءِ فیصلہ کتگ ۔
