بھارت لُچی ءُُ شتلی ءِ وسیلگ ءَ کشمیر ءِ الس آناں گیش دیراں تاں بندیگ کت نہ کنت
اسلام آباد ۔ 7 اگست (اے پی پی) مزن وزیر ءِ ھاسیں کمکار برائے اھوالکاری ءُُ شنگ کاری ڈاکٹر فردوس عاشق اعوان ءَ گوشت کہ بھارت لُچی ءُُ شتلی ءِ وسیلگ ءَ چہ کشمیر ءِ الس آناں گیش دیراں تاں بندیگ کت نہ کنت، کشمیری الس بھارت ءِ اے بندیگ کنگ ءَ را نہ من انت ۔ آ چار شمبے ءِ روچ ءَ حریت سروک عبدالحمید لون، کشمیر میڈیا سروس ءِ چیف ایگزیکٹو آفیسر تجمل الاسلام ءِ ھمبراھی ءَ پریس انفارمیشن ڈیپارٹمنٹ ( پی آئی ڈی) ءَ نیوز کانفرنس ءَ گوں گشتانک دیان ءَ کت ۔ فردوس عاشق اعوان ءَ گوشت کہ بھارت ھرچی بکنت بلے کشمیر ءِ لگت مالی اچ رنگ ءَ جائز بوت نہ کنت ءُُ ناں کہ ایشرا کشمیری الس من اَنت ۔ آئی ءَ گوشت کہ بھارت وتی توا میں لُچی ءُُ شتلی ءَ ابید کشمیر ءَ چہ وتی جنگ ءَ ہار ءِ داتگ اگاں اے وڑ مہ بوت انت گڈا آئی ءَ را آھودا لکھانی ارد ڈیوٹیءَ دارگ ءِ ضلورت نہ بوتگ اَت ۔ آئی ءَ گوشت کہ کشمیری آناں بھارت ءِ پیسلہ قبول نہ بیت ۔ آئی ءَ گوشت کہ 22کروڑ الس ءُُ مزن وزیر عمران خان استیں حکومت ءِ نیمگ ءَ چہ دل یکیمی دنت کہ پاکستان ءِ ھمک زھگ کشمیر ءِ واستہ قربانی دیگ ءَ تیار انت ۔ راجدپتر سبک دنت کہ اچ راج زور ءِ سر ءَ بندیگ سک دیراں بوت نہ کنت ۔ آئی ءَ گوشت کہ کشمیر ءَ ٹیلی فون سروس، کاروباری سروس ءُُ ٹرانسپورٹ مھتل اَنت وھدیکہ سرج میں دمگ ءَ کرفیو جنگ بوتگ ۔ آئی ءَ گوشت کہ اے بندش 5 ءُُ 6 اگست ءِ درمیانی شپ ءَ چہ گیش ترند کنگ بوتگ ۔ آئی ءَ گوشت کہ بھارتی صدر ءَ آرٹیکل 370ءُُ 35اے ءِ ھلاس کنگ ءِ واستہ نوٹیفیکیشن ءِ سر ءَ دست چنگل ھم جنگ بوتگ ۔
