اسلام آباد۔ 07 اگست (اے پی پی) بنجائی وزیر امور کشمیر و گلگت بلتستان علی امین گنڈاپور پارینے کہ کشمیر ننا شہ رگ ءِ، کشمیری پاکستان کن قربانی تننگ ءُ، نن اوفتے دا پیدوار کلہو ایتنہ کہ اوفتا جہد آجوئی ٹی نن اوفتے تون سلوک اُن، وزیراعظم عمران خان و دفاعی سرکڑدہ غاک بھارت نا گام گیج آ پبی ورندی تسنو، کشمیری تا ظلم و بیدادی آن پد ہم جہد آجوئی آ اوفتے سلام پیش کینہ۔ چارشنبے نادے آ پارلیمنٹ نا اسیجائی دیوان اٹی مقبوضہ کشمیر نا حالیت آتیا جاری شرہ ٹی بشخ ہلسا وزیر امور کشمیر وگلگت بلتستان علی امین گنڈاپور پارینے کہ نن بھارتی فیصلہ ءِ مسترد و اونا مذمت ءِ کینہ۔ داڑان بھارت نا مکروہ دروشم مون آ بسنے۔ مودی بھارت اٹی بیرہ ہندوراج ءِ خواہک۔ کشمیری ہراوڑ جنگ کننگ ءُ نن اوفتے سلام پیش کینہ۔ اسہ لکھ کشمیری شہید، یک ونیم لکھ بند، اسہ لکھ چناچوری، 30 ہزار زالبول جنوزان مسنو۔ جہانی برادری دا ویل آ توار چست کے۔ نن غٹ ادارہ غاتیان دا خواست کینہ کہ او تینا کڑد ءِ اداکیر۔ اقوام متحدہ سلامتی کونسل نا قرارداد آتیا بایدے عملدرآمد مرے۔ کشمیری ننا شہ رگ ءِ۔ کشمیر ننا دتر تیٹی وہک۔ اوننکن قربانی ایترہ۔ بھارت آن مست کشمیر نا ویل آ ہیت مریک۔ وزیراعظم پیدوار کرے کہ نن دتر نا آخریکو پڑی اسکان کانہ۔ دنیا دا کلہو ءِ سنجیدہ ہلے۔ پاکستان نا فوج ہم کشمیر نا حالیت آتیا پیدوار موقف تس۔ کشمیری تیکن کلہو ءِ کشمیری تا جہد کن نن اوفتے تون اُن۔ اپوزیشن دا ایوان اٹی بیرہ تقریرکپ۔ مودی ءِ ہراتم تینا برام تیا بٹنگ انگاکہ ہمووخت کشمیر اٹی بیدادی الوکہ۔ جندال بے ویزہ غان داڑے بس و پاننگاکہ اوڑتون جندی تعلقداری ءِ۔ اوفہ ٹی انت مس داہم پار۔ پاپاکن بلاول بھٹو تدوک آ دے دیوان اٹی ہرے کرفے۔ یو این نا کشمیر نا بابت رپورٹ دا ایوان اٹ اتینہ۔
