مقبوضہ کشمیر نا خصوصی حیثیت نا بدلی جنیوا کنونشن نا رداٹ جنگی ڈوہ اسے، عالم اسلام مسلمان تیا بیدادی نا ویل آ بایدے چپ مف
اسلام آباد۔ 07 اگست (اے پی پی) انسانی حق انا بنجائی وزیر ڈاکٹر شیریں مہرالنسامزاری پارینے کہ مقبوضہ کشمیر نا خصوصی حیثیت نا بدلی جنیوا کنونشن نا رداٹ اسہ جنگی ڈوہ اس مریک، عالم اسلام مسلمان تیا بیدادی نا ویل آ بایدے چُپ سلپ، کشمیر نا بابت آن بھارت نا داساڑی آ گام گیج آ جہانی رائے عامہ ءِ آوار کننگ کن گچین گام گیج چست کروئی مریک۔ چارشنبے نادے آ پارلیمنٹ نا اسیجائی دیوان اٹی مقبوضہ کشمیر نا حالیت آتیا جاری شرہ ٹی بشخ ہلسا بنجائی وزیر ڈاکٹر شیریں مزاری پارے کہ بھارت ہراگام گیج آتے چست کرینے وزیراعظم تدوک آ دے ہم ذکر کرے کہ ہرانظریہ نا رداٹ نریندر مودی نا حکومت او گام گیج آتے ہرفینے۔ ہمو ملک آک ہرا انسانی حق انا بیخ ءِ کشرہ و تینا آئین نا خلاف ورزی ءِ کیرہ۔ بھارت کشمیر آ کلسٹر بمب خسانے۔ بھارتی حکومت بدمعاشی آ بسنے۔ بھارت غٹ آن مست باب شش انا رداٹ کشمیر ءِ متنازعہ ویل اس امنا کرے و اودے پاکستان و بھارت نا نیام اٹ اسہ جہانی تنازعہ اس گوندا۔ اقوام متحدہ 1948 ء ٹی دادے متنازعہ ویل گوندا۔ اوپارے کہ جنیوا کنونشن نا شق 3آرٹیکل 49 نا رداٹ دا جنگی ڈوہ اس مریک۔ بھارت دا ڈوہ ءِ سرزد کرینے۔ ننا فرض مریک کہ نن جہانی کہول آ دا ویل ءِ ہرفن۔ بھارت اقوام متحدہ نا سلامتی کونسل نا قرارداد آتا بیخ ءِ کشانے۔ بھارت اسہ کنڈی وڑاٹ کشمیرنا خصوصی حیثیت ءِ بدل کننگ کپک۔ ڈاکٹر شیریں مزاری پارے کہ مچ آ کشمیری سرکڑدہ غاتے بھارت نظر بند کرے یا جیل آتیا درے۔ کشمیری تا نسل کشی ءِ کننگ انگ ءِ۔ جہانی برادری ءِ دمدستی وڑاٹ دا حالیت آتے باور کرفنگ نا گرجءِ۔ اوپارے کہ اسہ کیس اسے ٹی بھارتی سپریم کورٹ اٹی فیصلہ تننگاسس کہ کشمیر نا خصوصی حیثیت ءِ بدل کننگ مفک۔ اوپارے کہ بھارت و پاکستان ہڑتوم آک 1983ء ٹی جنیوا کنونشن نا دا معاہدہ غا دستخط کرینو ہراٹی کلسٹر بمب آتا کاریم اٹ اتنگ ءِ غیر کانودی گوندنگانے۔ اوپارے کہ بھارت انسانی حق انا خلاف ورزی کننگ ءِ۔ نن خواست کینہ کہ انسانی حق انا کونسل اسہ وتواجہ ءُ کمیٹی اس جوڑ کرسا مقبوضہ کشمیر اٹی انسانی حق انا خلاف ورزی تا جاست وپاست ءِ کے۔ حکومت جہانی کہول آ سفارت کاری نا کمک اٹ دا معاملہ ءِ پبی وڑاٹ چست کننگ کن گام گیج کننگ ءِ۔ اوپارے کہ عالم اسلام مسلمان تیا بیدادی آ بایدے چپ مف۔ او آئی سی ءِ دمدستی وڑاٹ متحرک کننگ نا سخت گرج ءِ۔ ننے کشمیری تے دا کلہو تروئی ءِ نن اوفتے تون بیرہ سفارتکاری نا وڑاٹ سلوک افن۔ نن اوفتا ہروڑاٹ پبی ساتھ ایتنہ۔ بھارتی گام گیج ڈیہہ نا امن کن خطرہ ءُ۔ اگہ بھارت جنگ خواہک تو پائے۔ نن دنیا ءِ مہالو آن پارینن کہ اگہ جنگ مس تو اونا اثرآک مچ آ دنیا غا تمرہ۔ مہالو ہراپالیسی ءِ اسرائیل تینا کرے داسہ ہمو پالیسی ءِ بھارت بناکرینے۔ کشمیری تا نسل کشی و کشمیر آ کوزہ نا پالیسی بھارت 1948 ء آن بناکرینے۔ بھارت نا کنڈآن کشمیری تا خصوصی حیثیت نا چٹفنگ اسہ جنگی ءُ ڈوہ اسے۔ بھارت جنگ و بیدادی نا تیاری تیٹی ءِ۔ پاکستانی قوم اکن دا حالیت آک قابل قبول افس۔ بھارت اگہ دا تکک کہ اوفتا کارروائی تیان کشمیری تا جہد چٹک تو دا اونا وہم ءِ۔ پاکستان کشمیری تتون سلوک ءِ۔ پارلیمنٹ نا امنائی اٹ امنائی قرارداد اس منظور کرسا دنیا ءِ جوان ءُ کلہو اس تننگے۔
