اسلام آباد۔ 06 اگست (اے پی پی) وزیراعظم نا خصوصی کمکار حوالکاری وشینکاری ڈاکٹر فردوس عاشق اعوان پارینے کہ اینو کشمیری تا جہد تون یکجہتی نا دےءِ، اسہ فورم اسے آ ہم اینو نادے بایدے سیاست مف، کشمیری ایڑھ ایلم تے باور کرفینہ کہ اسہ فورم اسے آہم اوفتے تنیا الیپنہ۔ وزیراعظم عمران خان کشمیر نا ویل آ جہانی کہو ل آ راہشون آتون رابطہ ٹی ءِ، بحیثیت قوم پارلیمنٹ نا اسیجائی دیوان اٹی کشمیر نا بابت یک زبان مرسا دنیا نا مون آ سلنہ۔ سے شنبے نادے آ پارلیمنٹ ہاؤس نا پیشن میڈیا تون گپ و تران کرسا ڈاکٹر فردوس عاشق اعوان پارے کہ اینو نادے کشمیری تا جہد تون یکجہتی نادے ءِ، اینو نادے اسہ فورم اسے آہم بایدے سیاست مف۔ بحیثیت قوم کشمیرنا مظلوم الس تون یکجہتی کرسا کلہو تروئی ءِ کہ پاکستان نا چناچنا کشمیرتون تفوک ءِ و کشمیر ننا شہ رگ ءِ و پاکستان کشمیر آن بیدس ادھوراءِ، کشمیر ننا رغ تیٹی دتر آنبار کاہک۔ اوپارے کہ مقبوضہ کشمیر اٹی اُراتا پیشن دہ دہ بھارتی فوجی سلفنگانے۔ بھارت مقبوضہ کشمیر اٹی تعینات تینا فوجی تا کچ اٹی اسہ لکھ 17 ہزار نا ودکی کرینے۔ بھارت کشمیر نا توار ءِ توننگ کن مہالو آن ہی مقبوضہ کشمیر اٹی تینا لکھ آ فوجی تے تعینات کرینے۔ ساڑی حالیت آتے ٹی کشمیر نا ہر بندغ پاکستان و پاکستان نا پارلیمنٹ نا کنڈا ہُننگ ءِ۔ اوپارے کہ پارلیمنٹ آن کشمیری تیکن یکجہتی نا کلہو ہِننگ المی ءِ۔ کشمیر ننا اسیجائی و قومی ویلءِ۔ داڑکن ننے غٹ ءِ اواری اٹ بھارت نا دا مکروہ عمل نا مذمت ءِ کروئی ءِ۔ ڈاکٹر فردوس عاشق اعوان پارے کہ کودک کشمیری تا مخ تفی ءِ برجاتخک۔ وزیراعظم عمران خان جہانی کہول آ چندی ملک آتا سرکڑدہ غاتون رابطہ ٹی ءِ۔ کشمیرنا بابت اولیت پارلیمنٹ نا تہہ ٹی طے مریک و غٹ انا مون آ تخنہ۔ اوپارے کہ اپوزیشن نا اصرار ئس کہ 370 و 35اے ءِ قرارداداٹ اوار کننگے و دابابت آن اپوزیشن نا است خواہی ءِ غٹ اسٹیک ہولڈر آتون اواری اٹ مفاہمت نا کمک اٹ ایسر کننگک و قرارداداٹی اوار کننگک۔ اوپارے کہ پارلیمنٹ نا خواہش نا رداٹ ہرا پارلیمنٹ اٹی طے مریک دا قرارداد 22کروڑ الس نا است خواہی تا ترجمانی ءِ کیک۔ ڈاکٹر فردوس عاشق اعوان پارے کہ نن اومیت کینہ کہ اِرادے اسیجائی دیوان اٹی تین پہ تینی یکجہتی، سیوت و کشمیری تا معاملہ غا یک زبان مرسا دوٹوک موقف پاکستان نا پارلیمنٹ نا کنڈآن دنیا نا مون آ اتسا بریک۔ اوپارے کہ اپوزیشن نا سرکڑدہ پاکستان نا بیانیہ نا مخ تفی ءِ کریسس اوڑااوفتا منت واری ءِ ہرفنہ۔ بھارت وار وار کشمیری تا حق ءِ لتاڑنگ ءِ۔ دنیا سلامتی کونسل نا قرارداد، حق خودارادیت ہرادے دنیا امنا کریسس، بھارت یواین سیکورٹی کونسل نا قرارداد آتا خلاف ورزی و بے توقیری ءِ کرینے و دا قراردادآتا بیخ ءِ کشانے۔ نن جہانی کہول آ کشمیری تا توار ءِ ہرفنہ۔ نن باور کرفنگ خوانہ کہ نن ہر حال اٹی ہر فورم آ کشمیری تا حق انا رکھ اکن کشمیری تتون سلوک نظر برینہ و کشمیر نا ویل ءِ غٹ اسٹیک ہولڈر آتون ہرفنہ۔ داوخت آ پی ٹی وی تون گپ وتران کرسا ڈاکٹر فردوس عاشق اعوان پارے کہ بھارت نا کاغدی کارروائی تے پاکستان مسترد کیک و او آئی سی نا کنڈآن کشمیری تا حق خودارادیت کن قرارداد بسنے ہراٹی کشمیر نا ویل انا ایسری و کشمیر نا مخ تفی ءِ کننگانے۔
