اسلام آباد۔ 06اگست (اے پی پی) وزیر مملکت سیفران و انسداد منشیات شہریار خان آفریدی تون امریکہ نا قائم مقام اسسٹنٹ سیکرٹری ساؤتھ ایشیاء ایلس ویلز و امریکی سفیر پال جونز داڑے سے شنبے نادے آ اوڑدہی کرے۔ اوڑدہی ٹی علاقائی سلامتی نا حالیت، اوغان امن عمل، اوغان باہوٹ آتا باوقار وطن آ پدی ہِننگ و اوفتا ویزہ غاتا جاری کننگ و ایلو معاملہ غاتیا گپ و تران مس۔ اوڑدہی ٹی امریکی ڈل اوغان باہوٹ آتا کمک کن امریکی حکومت نا پورو مخ تفی نا اعادہ ءِ کرے۔ ایلس ویلز حکومت پاکستان نا تدوک آ 40سال آن لکھ آ اوغان باہوٹ آتا مہمان نوازی و امداد آ منت واری ءِ ہرفسا پارے کہ پاکستان نا اوغان باہوٹ آتے کن امداد آ جہانی برادری و امریکی حکومت پاکستان نا منت وار ءِ۔ ایلس ویلز شہریار آفریدی آن پاکستان اٹی رہینگوک اوغان باہوٹ آتے کن ویزا پالیسی و پاسپورٹ نا جاری کننگ نا معاملہ غاتے زیر غور اتنگ نا درخواست کرے۔ اوپارے کہ پاکستان اٹی رہینگوک اوغان بزنس کمیونٹی ءِ مرکزی دنگ اٹ اتنگ آن حکومت پاکستان ءِ فائدہ مریک۔ امریکی حکومت نا اوغان باہوٹ آتے کن پدریسہ سفارتی و مالی کمکاری نا ستاءِ کرسا وزیر سیفران شہریار آفریدی پارے کہ حکومت اوغان باہوٹ آتے پاکستان اٹی اوفتا عارضی اڈکننگ اٹ ہر وڑامداد فراوان کننگ ءِ۔ اوپارے کہ اوغان باہوٹ آتا پاکستان اٹی 40 سال قیام اٹی اوغان باہوٹ و پاکستانی شاری تا نیام اٹ اسہ ہم ناخوشگوار واقعہ اس پیش بتنے۔ وزیر سیفران شہریار آفریدی جہانی برادری نا کنڈآن اوغان باہوٹ آتے کن امداد اٹی کمتی آ گڑتی نا درشانی ءِ کرسا پارے کہ جہانی امداد اٹی کمتی آن اوغان باہوٹ آتا راجی و شرحالی نا عمل زہمی مریک و خاص کر تعلیم و جان جوڑی نا بشخ زہمی مریک۔ اوپارے کہ حکومت پاکستان معاشی دباؤآن پد ہم اوغان مہاجر آتا امداد ءِ برجاتخانے۔ اوپارے کہ جہانی برادری ءِ پوسکن و متکن آ ڈونرآتے متحرک کروئی مریک تانکہ دا چیلنج آتون مون تننگ مرے۔ شہریارآفریدی جہانی باہوٹ آتے کن پوسکن آ جہانی پالیسی آ گڑتی نا درشانی ءِ کرساپارے کہ پالیسی سازی ٹی اوغان باہوٹ آتا ویل آتا ایسری ءِ بایدے اولیت تننگے۔ اوپارے کہ پاکستان تینا معاشی ویل آتیان پد ہم اوغان باہوٹ آتا تعلیم و جان جوڑی آ بھلو پیسہ اس خڑچ کننگ ءِ و اگہ جہانی پالیسی ٹی بدلی اتنگتو تو پاکستان آ پین دباؤ تمنگ نا گڑتی ءِ۔ امریکی ڈل و وزیر سیفران فیصلہ کریر کہ دا ویل آتیا پین سجفنگ کن اوڑدہی تاعمل برجاسلک و اوغان باہوٹ آتا پاکستان اٹی عارضی رہینگ انگ اٹی اوفتا ویل آتا ایسری کن اواری اٹ گام گیج کننگک۔
