18 اگست آہر پاکستان کم از کم اسہ نیال اس خلے، وزیراعظم
بروک آ چار سال اٹی 10 ارب درخت خلنگ نا ڈٹ ءِ پورو کینہ، خیبر پختونخواٹی اسہ ارب درخت خلنگ نا دنیا اعتراف ءِ کرے
اسلام آباد۔ 05 اگست (اے پی پی) وزیراعظم عمران خان پارینے کہ 18 اگست آ ہر پاکستانی کم از کم 2نیال خلے، مچ آ ملک اٹی بروک آ چار سال اٹی 10 ارب درخت خلنگ نا ڈٹ ءِ پورو کینہ، خیبر پختونخواٹی اسہ ارب درخت خلنگ بھاز بھلو کارنامہ اسے ہرانا دنیا اعتراف ءِ کرے، چناتا آخبت ءِ جوڑ کننگ کن ہر پاکستانی شجرکاری ٹی بشخ ہلے، شجر کاری آن ہی کچٹی و چاگڑدی بدلی تا ویل آتا مون ءِ توننگ مریک۔ او دوشنبے نادے آ شکر پڑیاں ٹی شجر کاری مہم نا چرجوئی ٹی اڈ ہلوک آ دود آن تران کریکہ۔وزیراعظم عمران خان داوخت آ نیال اس خلسا بشام نا شجر کاری مہم نا بناءِ کرے۔ وزیراعظم نا سلاہکار ماحولیات ملک امین اسلم و وزیر مملکت زرتاج گل وزیر ئسک ہم داوخت آ ساڑی ئسر۔ وزیراعظم پارے کہ ہراوڑ سجفوک وڑاٹ غٹ صوبہ غاتون اواری اٹ مچ آ ملک اٹی شجرکاری مہم نا بناءِ کننگانے اوڑامبارکباد پیش کیوہ۔ اوپارے کہ بروک آ چار سال اٹی 10 ارب درخت خلنگ نا ڈٹ ءِ پورو کننگک۔ اوپارے کہ اینو پاکستان ہندن ءُ جاگہ سے آ سلوک ءِ ہراڑے نن اودے ہندن ءُ ملک اس جوڑ کننگ کینہ ہرا دنیا کن مثال اس مریک۔ اوپارے کہ شجر کاری نا کمک اٹ نن ہمو ملک آتے ٹی اوار مننگ کینہ ہرافک تینے سرسوز و شاداب کریر۔ وزیراعظم پارے کہ خیبر پختونخوا ٹی ننا حکومت شجرکاری کن ہراکڑد ءِ ادا کرے۔ دنیا اونا معترف ءِ۔ 5سال آتے ٹی اسہ ارب درخت خلنگ بھاز بھلو کارنامہ اسے۔ دابابت شک و شبہ ودی کننگ نا کوشست کننگا ولے دنیا منا کہ اسہ ارب آن زیات درخت خلسا جنگل آتا رقبہ ٹی 6ءُ نیم درسد نا ودکی کرین و نن دا معجزہ بھازکم خڑچ اٹ پورو کرسا نشان تسن۔ ٹمبر مافیا ہرا خیبر پختونخواٹی بھاز واکدارئس و سیاست دان آتون اوار ی اٹ درخت آتے کاٹ کریکہ نن اونا مقابلہ ءِ کرین۔ جنگل آتا محکمہ نا چندی ورناک اوفتے تون مقابلہ کرسا شہید مسر۔ وزیراعظم پارے کہ داسہ ننے مچ آ پاکستان اٹ شجر کاری کروئی ءِ۔ دا پروگرام اٹی ورناتے زیات آن زیات تینا کڑد ءِ ادا کروئی مریک۔ اگہ نن شجر کاری کپنہ تو بروک آ سال تیٹی باسنی پین ودک، پِرکم مریک، کچٹی نا ویل شدت اختیار کیک، گلیشیئرز تالان مریک و ماحولیات آ منفی زہم تمک۔ اگہ ننے تینا آخبت ءِ رکھوک کروئی ءِ و بروک آ چین تے اسہ جوان ءُ پاکستان اس تروئی ءِ تو ننے زیات آن زیات درخت خلوئی مریک۔ مہالو برسات اٹی زرس درخت خلنگاکہ ولے دا بس اف۔ تینا چناتا آخبت ءِ رکھوک کننگ کن ہر پاکستانی دا ڈٹ اٹی بشخ ہلے و 18 اگست آ ہر پاکستانی کم از کم 2نیال خلے۔
