اسلام آباد۔ 05اگست (اے پی پی) پاکستان مقبوضہ جموں کشمیر نا بابت آن بھارتی حکومت نا کنڈآن کروک آ پڑو تا ترندی اٹ مذمت ءِ کرسا اوفتے مسترد کرسا پارے کہ بھارتی حکومت نا کنڈآن اسہ کنڈی گام گیج جھیڑہ ہی آ علاقہ نا حیثیت ءِ بدل کننگ کپک۔ دوشنبے نادے آ ترجمان دفتر خارجہ اسہ بیان اسے ٹی مقبوضہ جموں کشمیر نا بارواٹی بھارتی پڑو تیا ردعمل نا درشانی ءِ کرسا پارے کہ مقبوضہ کشمیر جہانی وڑاٹ امنا کروک جھیڑہ ہی ءُ علاقہ اسے۔ ترجمان پارے کہ بھارت نا حکومت نا کنڈآن اسہ کنڈی گام گیج دا جھیڑہ ہی حیثیت ءِ بدل کننگ کپک دُن کہ اقوام متحدہ نا سلامتی کونسل نا قرارداد آتے ٹی دا متنازعہ علاقہ ءِ۔ جموں کشمیر و پاکستان نا الس کن دا وخت اس ہم قابل قبول مفک۔ ترجمان پارے کہ جہانی جھیڑہ نا اسہ کڑدہ سے نا حیثیت اٹ پاکستان غیر کانودی گام گیج آتون مون تننگ کن غٹ ممکنہ کسر آتے اختیار کیک۔ پاکستان کشمیر نصب العین و مقبوضہ کشمیر نا الس نا تینا ناقابل تنسیخ حق خودارادیت نا دوئی کننگ کن سیاسی، اخلاقی و سفارتی مخ تفی ءِ برجاتخنگ کن پکا عزم انا اعادہ ءِ ہم کرے۔
