اسلام آباد۔ 05 اگست (اے پی پی) آزاد جموں و کشمیر نا صدر سردار مسعود خان پارینے کہ بھارت مقبوضہ کشمیر نا خصوصی حیثیت ءِ چٹفنگ نا ہرا گام گیج ءِ ہرفینے اوڑان اونا گندہ انگا چہرہ دنیا و کشمیری تامون آ پاش مسنے، کشمیر اسہ مقبوضہ ءُ علاقہ اسے ہراڑے بھارت ہشت لکھ فوج اتون پرامن کشمیری تتون جنگ کننگ ءِ، بھارت دفعہ 370 بھارت نواز جماعت آتا وفاداری ءِ ہلنگ کن تینا آئین نا بشخ اس جوڑ کریسس ولے اینو مقبوضہ کشمیر نا بھارت نواز جماعت آتیا ہم پیدوار مسنے کہ کشمیر آ بھارتی حیثیت اسہ کوزہ گر ملک اسے آن زیات اف۔ صدر آزاد جموں و کشمیر سردار مسعود خان دا خیال آتا درشانی ءِ تدوک آدے اسہ بیان اسے ٹی کرے۔ اوپارے کہ کشمیر نا خصوصی حیثیت ءِ چٹفنگ آن کشمیری تا جہد آجوئی آ ہچ ءُ پرخ اس تمپک، بھارت نا دا گام گیج اقوام متحدہ نا سلامتی کونسل نا قرارداد نمبر 91، 122 نا کھلی خلاف ورزی و جموں وکشمیر نا بارواٹ اقوام متحدہ نا تعلقدار قرارداد آتا نفیءِ۔ اوپارے کہ دہلی نا حکمران تا دا گام گیج نا اسہ مسخت اس داہم ارے کہ سفارت کاری و ثالثی نا کمک اٹ کشمیر نا ویل ءِ ایسر کننگ کن جہانی کوشست آتے لتاڑنگے۔ بھارت نا دا مذمت نا قابل قدم آن مقبوضہ کشمیر اٹی جاری تحریک آجوئی پین زیات مریک۔ اونا پاننگ ئس کہ پاکستان، آزاد کشمیر و گلگت بلتستان نا خلقت بھارت نا جنگی جنون نا مقابلہ ءِ کننگ کن ہروخت تیار ءُ۔
