اسلام آباد۔ 05 اگست (اے پی پی)چیئرمین سینیٹ محمد صادق سنجرانی پارینے کہ سعودی عرب کشمیر نا ویل انا ایسری کن تینا کڑد ءِ ادا کے، سعودی مملکت تون تعلقداری تے قدر انا نظر اٹ ہرینہ، است خواہی ءِ کہ دا تعلقداری تے پین ودفنگے، پاکستان اٹی زرکاری کن بھلو وارخواہی اس ساڑی ءِ۔ داخیال آتا درشانیءِ او دوشنبے نادے آ سعودی عرب نا سفیر نواف بن سعد المالکی تون اوڑدہی ٹی کرے۔ اوڑدہی ٹی ہڑتوم آ کنڈآتا تعلقداری، اہم جہانی و علاقائی معاملہ غاتیا گپ و تران کننگا۔ سعودی سفیر بے پت تحریک اٹی ایوان بالا نا کنڈآن اونا پبی پت انا درشانی آ چیئرمین سینیٹ محمد صادق سنجرانی ءِ مبارکبادی تس۔اوڑدہی ٹی چیئرمین سینیٹ صادق سنجرانی پارے کہ ہڑتوم آ ملک آتا نیام اٹ تعلقداری تے مون آ دننگ اٹ ایوان بالا نمان کڑد ادا کننگ کیک۔ سعودی عرب تون تعلقداری تے قدر انا نظر اٹ ہرنہ۔ اوپارے کہ است خواہی ءِ کہ دا تعلقداری تے پین ودفنگے۔ اوپارے کہ پاکستان اٹی زرکاری کن بھلو وارخواہی اس ساڑی ءِ۔ چیئرمین سینیٹ پارے کہ سعودی زرکارآک چندی بشخ آتے ٹی زرکاری نا وارخواہی تیان فائدہ ہرفنگ کیرہ۔ پاکستان و خاص کر بلوچستان اٹی زرکاری ٹی است خواہی آ سعودی حکومت و محمد بن سلمان نا منت وار اُن۔ اوپارے کہ مقبوضہ کشمیر اٹی جاری بھارتی بیدادی بھارت نا اصل چہرہ ءِ پاش کرینے۔ محمد صادق سنجرانی پارے کہ بھارتی درندگی نا برخلاف توار چست کننگ مسلمان ملک آتا اجتماعی زمواری ءِ۔ اسلامی ملک آتا تنظیم مقبوضہ کشمیر نا الس نا توار ءِ جہانی کہول آ تالان کننگ کیرہ۔ اوپارے کہ پاکستان او آئی سی آن خواست کیک کہ کشمیر نا ویل انا ایسری کن گچین کڑد ادا کے۔ پاکستان و سعودی عرب اٹی ہمیشہ جہانی فورم تیا جھیڑہ غاتا پرامن ایسری آ زور شاغانے۔ سعودی عرب کشمیر نا ویل انا ایسری کن تینا کڑد ءِ ادا کے۔ داوخت آ سعودی سفیر پارے کہ پاکستان ڈیہہ نا اہم ءُ ملک اسے۔ ویل آتا ایسری ءِ مذاکرات نا کمک اٹ پٹنگ مریک۔ سعودی عرب پاکستان تون تینا ہڑتوم آ کنڈآتا تعلقداری تے بے کچ اہمیت ایتک۔
