فیصل آباد ۔ 02 اگست (اے پی پی) وزیراعلیٰ پنجاب سردار عثمان بزدار پارینے کہ حکومت پنجاب نا جان جوڑی غٹ اکن ڈٹ انا رداٹ جھنگ و پنجاب نا ایلو شار تیانبار فیصل آباد و چنیوٹ اٹی ہم لکھ آ غریب، نادار ، مفلس و حقدار خاہوت آتے ٹی جان جوڑی انصاف ہیلتھ کارڈ آتا بشخنگ نا پروگرام نا بناءِ کننگانے ہرانا رداٹ فیصل آباد نا 22درسد آبادی نا تناسب آن 4لکھ 11ہزار و چنیوٹ نا 23درسد آبادی نا تناسب اٹ 88ہزار آن زیات غریب خاہوت آتے فی خاہوت 7 لکھ 20 ہزار روپئی اسکان نا ہیلتھ کارڈ دوئی مریک و لاہور یا پین بھلو شاراسے آ درمان کرفنگ کن ہِننگ نا حالیت اٹی تعلقدار خاہوت ءِ کرایہ ہم حکومت فراوان کیک ہراڑتون اوار اوار جان جوڑی انصاف کارڈ تخوک آ خاہوت تینا اُرانا ہربندغ نا مفت درمان ءِ کرفنگ کیک پنجاب اٹی اولیکو مرحلہ ٹی 70 لکھ حقدار و نیزگار خاہوت آتے ٹی جان جوڑی انصاف ہیلتھ کارڈ بشخنگ انگ ءِ نیز فیصل آباد کن ارب آ روپئی نا خڑچ آن ایسٹرن ویسٹ واٹر پلانٹ اس خلنگ آن بیدس 112ارب روپئی نا خڑچ آن داڑے سالانہ شونداری پروگرام نا رداٹ 500 ڈٹ آتے ہم پورو کننگ انگ ءِ ہرافتا مسخت نئے بیرہ الس ءِ غٹ بنداوی آسراتی تا فراوانی ءِ بلکن عمران خان گچین کاری تا وخت آ ہرا ایجنڈا نا پڑو ءِ کریسس اونا رداٹ الس نا خذمت نا دا ایجنڈا نا پوروی ءِ المی کننگک و دارداٹ غٹ دوئی وسیلہ غاتے کاریم اٹ اتنگک و الس زوت ساڑی آ پاکستان ءِ پوسکن آ بدلینگوک آ پاکستان اس خنک ہراڑکن دے و نن کوشست آک برجاءُ ۔ جمعہ نا دے آ فیصل آباد میڈیکل یونیورسٹی آڈیٹوریم اٹی فیصل آباد و چنیوٹ نا ضلع غاتا حقدار خاہوت آتے ٹی جان جوڑی انصاف ہیلتھ کارڈ بشخنگ نا دود آن تران اٹی سردار عثمان بزدار پارے کہ عمران خان نا ویژن نا رداٹ راج انا پسماندہ و گوجالنگوک آ تپہ غاتا محرومی تا ازالہ ءِ کننگ کن دمدستی گام گیج آتے المی کننگ انگ ءِ و مرحلہ وار نیزگار وحقدار خاہوت آتے نئے بیرہ جان جوڑی بلکن تعلیم تون اوار ایلو غٹ بنداوی آسراتی تا مفت فراوانی ممکن کننگک ۔ اوپارے کہ داسہ اسہ غریب اس ہم و بے وسیلہ بندغ اس بیرہ داسوب آن مرک انا باٹی ہنپک کہ اوڑتون درمان کن پیسہ اف ۔ اوپارے کہ پی ٹی آئی حکومت نا جان جوڑی انصاف کارڈ پروگرام نا رداٹ پنجاب نا 70لکھ، فیصل آباد نا 4لکھ 11ہزار و چنیوٹ نا 88 ہزار خاہوت آتے ٹی جان جوڑی انصاف کارڈ بشخنگ انگ ءِ و داوخت اسکان 25لکھ انا خڑک خاہوت آتے دا آسراتی گام گیج اٹ اوار کننگانے ۔ اوپارے کہ دا پروگرام نا رداٹ جان جوڑی انصاف کارڈ تخوک آ ہر خاہوت ءِ 7لکھ 20 ہزار روپئی اسکان مالیت نا ہروڑنا درمان نا مفت آسراتی دوئی مریک ۔ اوپارے کہ ہراخاہوت نا سروک نا پن آ جان جوڑی انصاف کارڈ جاری کننگ انگ ءِ او نئے بیرہ تینا بلکن داپیسہ غاتے ٹی تینا خاہوت نا ہر بندغ نا ہر شاراٹی درمان ءِ کرفنگ کیک ۔
