اسلام آباد ۔ 02اگست (اے پی پی) وزیراعظم نا خصوصی کمکار احتساب شہزاد اکبر پارینے کہ 90ء نا دہائی آن سیاست اٹی بروک آ اسہ خاہوت اس قومی خزانہ ءِ بے دڑدی اٹ پلوک آ ہنڈی حوالہ آن پیسہ غاتے پیشن نا ملک آتیا گدریفسا ماڑی و میرات جوڑ کریر، شہباز شریف آن پد مریم نواز ءِ ہم ہل میٹل آن جتا ٹیلی گراف ٹرانسفر نا ذریعہ 66;46;9 ملین منتقل مس ، دافتے خراج گوشوارہ غاتے ٹی پاش کننگتنے، قومی احتساب بیورو ءِ دا ودکی آپوسکن آ شاہدی تے گدریفینن ۔ جمعہ نادے آ پی آئی ڈی ٹی پریس کانفرنس آن تران کرسا وزیراعظم نا خصوصی کمکار شہزاد اکبر پارے کہ شہباز شریف و اونا خاہوت نا ٹیلی گرافک ٹرانسفر(ٹی ٹی) مون آ ایسون تو ہموکان پڑو کننگاکہ کنے برطانیہ نا عدالت آتیا ہنوئی تمک، ای داڑکن تیار ئسٹ ولے داسکان دا نوبت بتنے ولے اینو ہرا پوسکن آ ٹی ٹی تا پت ءِ پاش کننگ والا اُٹ اومیت ءِ کہ داکان پد کنے برطانوی عدالت آتیا ہنوئی تمک ۔ اوپارے کہ 90 ء نا دہائی ٹی اسہ خاہوت اس اقتدار اٹی بس، او اسہ ہندن ءُ کانود اس جوڑ کریر ہراڑان پیشن نا ملک آتیان بروک آ پیسہ غاتیا خراج و سوب نا بابت پوچھ گچھ مننگ کتوکہ ۔
