آبادی ٹی ودکی و ڈغاری راستکی تا رداٹ اسلام آباد نا ماسٹر پلان نا اول سرآن جاچ ءِ ہلنگ نا گرج ءِ، وزیراعظم عمران خان

اسلام آباد ۔ 02اگست (اے پی پی) وزیراعظم عمران خان پارت کرینے کہ آبادی ٹی ودکی و ڈغاری راستکی تا رداٹ اسلام آباد نا ماسٹر پلان نا اول سرآن جاچ ءِ ہلنگ و مرتب کننگ نا گرج ءِ وخت اس کہ گرین ایریہ غاتا رکھ اکن ہم دمدستی گام گیج و تعمیرات نا بابت آن ذیلی کانود ءِ زوت آن زوت حتمی دروشم تننگے ۔ اوداپارت ءِ جمعہ نادے آ بنجائی دارالحکومت نا ماسٹر پلان نا بابت بڑزکو کہول انا دیوان نا کماشی ءِ کرسا تس ۔ دیوان اٹی خصوصی کمکار ذوالفقار عباس بخاری، باسک قومی اسمبلی اسد عمر، چیئرمین سی ڈی اے عامر احمد علی و تعمیرات ، ٹاءون پلاننگ ، ماحولیات ، کانود و ایلو تعلقدار بشخ آتون گنڈوک پنی آ چاہندارآک ساڑی ئسر ۔ دیوان اٹی بنجائی دارالحکومت اٹی مستین اٹی مروک آ بے ربط تعمیرات و بے جامع ڈٹ بندی نا مروک آ تالانی و نتیجتا الس ءِ مون تروک مشکل بشمول چاگڑدی و انتظامی ویل آتیا سرجم گپ و تران مس ۔ وزیراعظم پارے کہ بنجائی دارالحکومت نا آبادی ٹی پدریسہ ودکی و شار انا تالانی و انتظام نا بابت تعلقدار ویل آتا ایسری ءِ مستین اٹی یکسر گوجالنگا ہرانا نتیجہ ٹی تعمیرات اٹی بے ہنگم ودکی و گرین ایریہ غاتا تلفی نا دروشم اٹ پیش تمانے ۔ اوپارے کہ گرین ایریہ غاتے ٹی کمتی نا سوب چاگڑدی بدلی تا منفی زہم تیٹی پین ودکی مسنے ۔ وزیراعظم پارے کہ چاگڑدی تغیر و کچٹی ملک انا بھلا ویل ءِ ہراڑادمدستی چکار کننگ نا گرج ءِ ۔ وزیراعظم پارت کرے کہ آبادی ٹی ودکی و ڈغاری راستکی تا رداٹ ہراڑے اسلام آباد نا ماسٹر پلان نا اول سرآن جاچ ءِ ہلنگ و مرتب کننگ نا گرج ءِ ہموڑے عبوری وخت اکن گرین ایریہ غاتا رکھ اکن دمدستی گام گیج و تعمیرات آتا بابت آن ذیلی کانود ءِ زوت آن زوت حتمی دروشم تننگے ۔ وزیراعظم پارے کہ پوسکن آ پاکستان ہاءوسنگ ڈٹ انار داٹ اسلام آباد اٹی واقع کچہ انگا آبادی تا رہینگوک آتے گچین ہنکینی آسراتی فراوان کننگ آ کاریم برجاءِ تانکہ ہموجاگہ نا ہنکینی تے پوسکن آ شاری آسراتی دوبننگ کے و اوفتا زند انا آب بڑز مرے ۔ چیئرمین سی ڈی اے نا کنڈآن اسلام آباد اٹی بناکروک آ شجر کاری مہم آ ہم وزیراعظم ءِ حوال ہم تننگا ۔