وزیر داخلہ اعجاز احمد شاہ نا کماشی ٹی انسداد تجاوزات کمیٹی نا دیوان

اسلام آباد ۔ 01اگست (اے پی پی) وزیر داخلہ اعجاز احمد شاہ نا کماشی ٹی انسداد تجاوزات کمیٹی نا دیوان پنچ شنبے نادے آ اڈ ہلک ۔ دیوان اٹی وزیراعظم نا خصوصی کمکار جان جوڑی ظفر مرزا، ایلو پارلیمانی باسک آک، چیئرمین سی ڈی اے ، ایم سی آئی باسک آک و وزارت داخلہ نا آفیسر آک بشخ ہلکر ۔ دیوان اٹی تجاوزات آتا بابت مون تروک ویل آتیا شرہ کننگا و کھوکہ خلنگ نا ویل آ سرجم گپ و تران کننگا ۔ وزیر داخلہ ہر سیکٹر اٹی اسہ وڑ ڈیزین نا رداٹ خاص انگا جاگہ غاتیا کھوکہ خلنگ نا موکل تننگ نا پارت کرے و پارے کہ ہر بندغ نا روزی و آسراتی ہڑتوم آتے مون آ تخنگے ۔ وزیر داخلہ پارے کہ ہر سیکٹر اٹی کم از کم اسہ جاگہ اس مقرر کننگے، آبادی و گرج انا رداٹ اسٹ آن زیات جاگہ غاتے ہم کھوکہ و تولنگ ناجاگہ کن مخصوص کننگ مریک ۔ اوشار اٹی مون تروک ایلو ویل آتا دمدستی ایسری کن پرمان جاری کرے ۔