وزیراعظم عمران خان نا اقوام متحدہ نا ریذیڈنٹ کوآرڈینیٹر تون اوڑدہی ٹی گپ و تران

حکومت جان جوڑی و تعلیم نا بشخ آتیا خصوصی چکار کننگ ءِ
اسلام آباد۔ 31جولائی (اے پی پی) وزیراعظم عمران خان تون اقوام متحدہ نا ریذیڈنٹ کوآرڈینیٹر نیل بوہنے چارشنبے نادے آ داڑے وزیراعظم آفس اٹی اوڑدہی کرے ہراٹی بنجائی وزیر اقتصادی امور ڈویژن محمد حماد اظہر و وزیراعظم نا خصوصی کمکار ڈاکٹر ثانیہ نشتر ئسک ہم ساڑی ئسر۔ نیل بوہنے وزیراعظم عمران خان ءِ گچین طرز حکمرانی، جان جوڑی، تعلیم، شونداری، نوجوانان، آبادی آ کنٹرول و چاگڑدی ویل آتا مون ءِ توننگ کون آ معاملہ غاتا چرجوئی ٹی اقوام متحدہ نا چندی ادارہ غاتا تعلقدار حکومتی ادارہ و وزارت آتون اشتراک نا بارواٹ معلومدار کرے۔ اقوام متحدہ نا ریذیڈنٹ کوآرڈینیٹر وزیراعظم عمران خان نا وژن و ساڑی حکومت نا کنڈآن مستین اٹی گوجالنگوک آ دا ویل آتون مون تننگ کن چست کروک آ گام گیج آتا ستاءِ کرے۔ اوخاص وڑاٹ حکومت نا کنڈآن غذائی کاختی نا سوب نشوونما نا ویل، بنداوی طبی نگہداشت اٹی گچینی، ماحولیاتی بدلی نا خراب زہم تا چٹفنگ کن 10 ارب درخت خلنگ نا ڈٹ و ملک اٹی نیزگاری نا چٹفنگ کن جامع پروگرام ”احساس“ نا بناءِ کننگ کن کوشست آتا خاص وڑاٹ ستاءِ کرے۔ وزیراعظم عمران خان تینا حکومت نا اولیت آتے تالان کرے۔ غذائی کاختی نا سوب آن نشوونما نا ویل آتا بابت گپ وتران کرسا وزیراعظم عمران خان پارے کہ حکومت دا ویل اتون مون تننگ آ خصوصی چکار کننگ ءِ انتئے کہ دا ویل انا سوب آن ملک انا ورناآبادی نا نشوونما غا بھاز زیات اثرتمک۔ اوپارے کہ اوار کروک آ قبائلی علاقہ غاتا شونداری ساڑی حکومت نا اسہ پین اہم ءُ اولیت اسے۔ اوپارے کہ ساڑی حکومت اوار مروک آ علاقہ غاتا شونداری کن پاکستان نا تاریخ اٹی غٹ آن زیات فنڈ جتا کرینے۔ حکومت نا اہم انگا”احساس“پروگرام نا بابت گپ و تران کرسا وزیراعظم دا پروگرام نا چندی اہم ٹک آتے تالان کرے و اقوام متحدہ نا ادارہ غاتا کنڈآن تروک آ تکنیکی کمکاری نا ستاءِ کرے۔ آبادی ٹی ودکی نا معاملہ غا گپ و تران کرسا وزیراعظم پارے کہ آبادی نا معاملہ بنداوی طبی نگہداشت و بنداوی تعلیم تون گنڈوک ءِ، ہنداخاطران حکومت دا بشخ آتیا خصوصی چکار کننگ ءِ۔ اوڑدہی ٹی پاکستان آن پولیو نا چٹفنگ کن کروک آ کوشست آتیاہم گپ و تران کننگا۔ وزیراعظم بلین ٹری سونامی نا ڈٹ انا سرسہبی ءِ تالان کرسا پارے کہ 10 ارب درخت خلنگ نا ڈٹ آن ملک اٹی چاگڑدی بدلی آ تموک آ منفی زہم تا مون ءِ توننگ اٹ کمک رسینگک و داچرجوئی ٹی دا بے کچ اہم ڈٹ ثابت مریک۔ نیل بوہنے وزیراعظم ءِ باور کرفے کہ اقوام متحدہ نا ادارہ حکومت نا کنڈآن کروک آ دا کوشست آتے ٹی تینا پبی کمکاری و کمک فراوان کیک۔