صدر مملکت ڈاکٹر عارف علوی نا پنچ می دولت مشترکہ پارلیمانی ایسوسی ایشن ایشیاء ریجن کانفرنس 2019ء آن تران

اسلام آباد۔ 30 جولائی (اے پی پی) صدر مملکت ڈاکٹر عارف علوی نیزگاری، موسمیاتی بدلی، جان جوڑی و تعلیم، آبادی ٹی ودکی تون اوار علاقائی و جہانی ویل آتون مون تننگ کن مشترکہ حکمت عملی ءِ المی گوندسا پارینے کہ مون تروک چیلنج آتون جوان وڑاٹ مون تننگ کن جمہوریت و پارلیمان نا کڑد بے کچ اہمیت تخک، دولت مشترکہ پارلیمانی ایسوسی ایشن ایشیاریجن جہانی جھیڑہ غاتا ایسری ٹی اہم ءُ کڑد اس ادا کننگ کیک، دا کانفرنس ڈیہہ آن نیزگاری نا چٹفنگ و پائیدار شونداری نا دوئی کننگ اٹ کمکار مریک، چندی ملک آتا نیام اٹ جھیڑہ غاتا ایسری کن السی است خواہی تے مون آ تخنگے، پاکستان تون اوار ڈیہہ نا آخبت روشناءِ۔ داخیال آتا درشانی ءِ او سے شنبے نادے آ پنچ می دولت مشترکہ پارلیمانی ایسوسی ایشن ایشیا ریجن کانفرنس 2019ء آن تران کرسا کرے۔ اوپارے کہ ایشیا نا ڈیہہ نا شونداری و شونہالی کن دا کانفرنس بے کچ اہم ءِ۔ دا کانفرنس ءِ اڈ تننگ نا مسخت نیزگاری نا چٹفنگ، پائیدار شونداری ہدف آتا دوئی کننگ و ورناتا اوار مننگ ءِ۔ داکانفرنس نا اڈتننگ آ اسپیکر قومی اسمبلی مبارکباد نا حقدار ءِ۔ اوپارے کہ زیات تر سیاسی جماعت آک ماڈل ویلفیئر ٹرسٹ نا ایجنڈا ءِ ہلسا برسراقتدار بریرہ، الس نا راجی آسراتی ریاست نا زمواری ءِ،ہر بندغ نا ویل آتا ایسری نا زمواری پارلیمنٹ آ مریک۔ اوپارے کہ ہر حکومت اٹی پارلیمنٹ نا اہم ءُ کڑد اس مریک۔ دنیا ٹی ہر جاگہ غا حکومت ءِ چلیفنگ نا گچین انگا ذریعہ پارلیمنٹ ءِ۔ اقوام متحدہ نا منشور اٹی ملک آتا نیام اٹ و ملک آتا تہہ ٹی تینا آئین اٹی الس نا راجی آسراتی نا ضمانت ءِ تننگانے۔ اوپارے کہ سیاسی ٹیکنالوجی و صنعت اٹی انقلاب کن مشترکہ کوشست المی ءِ۔ مشترکہ چیلنج آتون مون تننگ کن پارلیمانی رابطہ المی ءِ۔