کشمیر نا ویل ءِ پاکستان نا خارجہ پالیسی ٹی مرکزی حیثیت دوئی ءِ، ڈاکٹر شیریں مزاری نا یورپی پارلیمنٹ نا باسک رچرڈ کاربیٹ، ارینا وان، شفق محمد و ایلوفتے تون اوڑدہی ٹی گپ و تران

اسلام آباد۔ 30 جولائی (اے پی پی) بنجائی وزیر انسانی حق ڈاکٹر شیریں مزاری پارینے کہ کشمیر نا ویل ءِ پاکستان نا خارجہ پالیسی ٹی مرکزی حیثیت دوئی ءِ، جہانی برادری ویل ءِ ایسر کرفنگ کن بھارت آ زور شاغنگ تون اوار اوار مقبوضہ کشمیر اٹی زالبول و چناتا حق انا رکھ ءِ المی کے، وزارت ملک اٹی انسانی حق انا رکھ اکن پرعزم ءِ، زوراکی مذہب ءِ بدل کننگ نا توننگ کن ٹاسک فورس فعال کاریم کننگ ءِ خواجہ سرا تا حق اکن جوڑ کروک آ کانود آ سختی اٹ عملدرآمد کننگ انگ ءِ، یورپی ملک آک مسلمان تا حق انا رکھ ءِ المی کیر۔ داخیال آتا درشانی ءِ او سے شنبے نادے آ یورپی پارلیمنٹ نا باسک رچرڈ کاربیٹ، ارینا وان، شفق محمد و جموں کشمیر اینڈ سیلف ڈیٹر مینشن موومنٹ انٹرنیشنل نا چیئرمین راجہ نجابت حسین تون اوڑدہی ٹی کرے۔ ڈاکٹر شیریں مزاری ڈل ءِ انسانی حق انا رکھ انا بابت پاکستان اٹی کروک آ گام گیج آتا بابت پارے کہ ملک اٹی انسانی حق اٹی نئے بیرہ ساڑی کانود آ عملدرآمد ءِ المی کننگ انگ ءِ بلکن ہراڑے گرج ءِ پوسکن ءُ کانود ہم جوڑ کننگ انگ ءِ۔ اوپارے کہ نن چائلڈ پروٹیکشن ایکٹ آ سختی اٹ عمل کننگ اُن، و بنجائی دارالحکومت اسلام آباد اٹی وزارت نا کنڈآن اسہ چائلڈ پروٹیکشن سینٹر اس ہم چلینگ انگ ءِ۔ داکان بیدس جیونائل ایکٹ آہم سختی اٹ عمل کننگ انگ ءِ و خیبر پختونخوا ٹی چار جیونائل کورٹس جوڑ کننگانے۔ پنجاب اٹی اسٹ وخت اس کہ ایلو صوبہ غاتے ٹی جیونائل کورٹس انا جوڑ کننگ آ کاریم برجاءِ۔ شیریں مزاری ڈل ءِ پارے کہ پاکستان نا خارجہ پالیسی ٹی کشمیر ءِ مرکزی حیثیت دوئی ءِ و جہانی برادری کشمیر نا ویل ءِ ایسر کرفنگ اٹ نئے بیرہ بھارت آ زور شاغے بلکن ہموڑے زالبول و چناتتون انسانی حق انا خلاف ورزی تا دمدستی نوٹس ءِ ہلے۔ اوپارے کہ بھارت مقبوضہ کشمیر اٹی آرٹیکل 35-Aءِ بدل کننگ نا کوشست کننگ ءِ ہرانا پبی مذمت ءِ کینہ۔