اسپیکر قومی اسمبلی اسد قیصر نا دولت مشترکہ نا پنچ می ایشیا ء ریجن کانفرنس نا بنائی دیوان آن تران

اسلام آباد۔ 30 جولائی (اے پی پی) اسپیکر قومی اسمبلی اسد قیصر پارینے کہ پارلیمانی سفارتکاری نا کمک اٹ ریاست آتے اسہ ایلو نا خڑک اتنگ مریک، ہراڑان اوفتا نیام اٹ تین پہ تینی تعلقداری و کمکاری آ مبنی تعلقداری تے استوار کننگ اٹ کمک رسینگک، داڑان نیزگاری نا چٹفنگ، تعلیم و جان جوڑی نا آسراتی تا گچینی، اقتصادی کمکاری ءِ مون آ دننگ تون اوار ایلو تین پہ تینی است خواہی نا ہدف آتا دوئی ممکن ءِ، ڈیہہ نا ملک آتے علاقائی شریدار مننگ کن تینا منڈی تسکان اسہ ایلو ءِ رسینگ تروئی مریک و واپار و زرکاری ٹی بروک آ اڑاند آتے اسہ ایلو کن کم آن کم کروئی مریک۔ داخیال آتا درشانی ءِ او سے شنبے نادے آ دولت مشترکہ نا پنچ می ایشیاء ریجن کانفرنس نا بنائی دیوان آن تران کرسا کرے۔ اسپیکر قومی اسمبلی اسد قیصر پارے کہ پنچ می سی پی اے ایشیائی علاقائی کانفرنس 2019ء نا وخت آ دولت مشترکہ نا برادری تون بشخ ہلنگ وساڑی گری کنکن خوشی و عزت افزائی نا سوب ءِ۔ ای تینا کنڈآن، پاکستان نا الس و پارلیمنٹ نا کنڈآن اسلام آباد اٹی نمے غٹ ءِ بخیر اٹ پاوہ۔ اومیت ءِ کہ دا کانفرنس اسہ عظیم و شون ہلوک سویلی ایشیا نا کنڈاپارلیمانی سفر اٹی اسہ اہم ءُ مزل نا نشان اس مریک۔ اوپارے کہ صدر پاکستان نا دا کانفرنس اٹی بشخ ہلنگ، پارلیمانی جمہوریت و فیصلہ سازی نا عمل اٹ کانود ساز ادارہ غاتا کڑد انابارواٹ اوفتاعزم مصمم نا غماز ءِ۔ ای دا کانفرنس اٹی بشخ ہلنگ آ غٹ مندوبین تا منت واری ءِ ہرفیوہ۔ اوپارے کہ جمہوریت نا سوگوی و تین پہ تینی کمکاری ءِ مون آ دننگ نا تینا مشترکہ عزم انا اعادہ ءِ کننگ خواوہ۔ داہیت یقینا بے کچ است جمی نا سوب ءِ کہ نوزائیدہ جمہوریت آتیان پد ہم علاقائی کانود ساز ادارہ غاک جمہوریت نا سوگوی نا کوشست آتا پبی مخ تفی ءِ کیرہ۔ اسپیکر قومی اسمبلی پارے کہ ای دا اومیت نا درشانی ءِ کیوہ کہ جمہوری رابطہ غاتے گہراکننگ، السی کہول آ رابطہ غاتے مون آ دننگ و علاقائی کمکاری ءِ ودفنگ کن پاکستان نا قومی اسمبلی و سی پی اے نا ایشیائی ریجن نا نیام اٹ تین پہ تینی کمکاری برجاسلک۔ سویلی ایشیا اسہ ہندن ءُ ڈیہہ اسے ہرا علاقائی سیاست نا سوب آن گھٹن نا گواچی ءِ۔ اوپارے کہ سویلی ایشیانا حالیت و واقعہ غاتے شاذونادرہی اونا شاری تا ودوک آ جمہوری شعور انا نظراٹ ہُننگانے۔ جمہوریت نا طاقت ڈیہہ ٹی السی پسند و ناپسند ءِ تالان کننگ نا بناءِ کرینے۔ اسپیکر قومی اسمبلی پارے کہ داہیت است جمی نا سوب ءِ کہ دا سویلی ایشیا ہی ءِ ہراڑے کاریم کننگ نا وئی والا دنیا نا غٹ آن بھلا آبادی ساڑی ءِ۔ ننا ڈیہہ نا علاقائی سیاسی اہمیت، نیامی ایشیاء و تیل انا دولت آن ہمپوک خلیجی ملک آتون ننا مشترکہ سیم، ننا قدرتی وسیلہ و ننا افرادی قوت، ننا ڈیہہ نا ترند انگا شونداری نا گمان تے بھاز زیات روشنا کیک۔ اوپارے کہ ننے تینا علاقائی ہمسایہ غاتون، علاقائی شریدار مننگ کن، تینا منڈی تے اسہ ایلو کن ملوئی مریک، ننے تینا فرض ءِ جوان وڑاٹ سرانجام تننگ کن ہم گرنچی و کمکاری ودی کننگ نا گرج ءِ۔