بنجائی وزیر ریلوے شیخ رشید احمد سندھ و کراچی نا مسہ دے ئی دورہ غا سکھر آ سرمس، مین لین ون نا ریل ٹریک آ سندھ اٹی ونڈو ٹریلنگ کیک

اسلام آباد۔ 30 جولائی (اے پی پی) بنجائی وزیر ریلوے شیخ رشید احمد سندھ و کراچی نا مسہ دے ئی دورہ غا سکھر آ سرمس، بنجائی وزیر ریلوے (اینو) چارشنبے نادے آ مین لین ون نا ریل ٹریک آ سندھ انا تہہ ٹی ونڈ وٹریلنگ کیک۔ رحیم یار خان آن بذریعہ ٹرین نواب شاہ اسکان ٹریک انسپیکشن کینہ۔ وزیر ریلوے رحیم یار خان، صادق آباد، ولہار ریلوے اسٹیشن، روہڑی، مہر آباد و نواب شاہ اسٹیشن آتا دورہ ءِ کیک۔ یکم اگست آ شیخ رشید احمد مین لین ٹوانا ٹریک ءِ ہرک۔ بذریعہ انسپیکشن ٹرین لاڑکانہ، دادو، سہون شریف، و کوٹری اسٹیشن تا دورہ ءِ کیک۔ وزیر ریلوے شیخ رشید احمد اِرااگست آ کراچی آ سرمریک و پریس کانفرنس آن تران کیک۔ وزیر ریلوے سکھر ریلوے ڈویژن اٹی تدوک آ کیہی سال آن مروک آ ریل شکست آتا جاچ اکن خصوصی وڑاٹ دورہ ءِ کننگ ءِ۔ اندرون سندھ دورہ ٹی ریلوے نا غٹ بشخ آتیان تعلقدار بڑزکو آفیسر آک ہم اوڑتون اوار مریرہ۔ وزیر ریلوے سکھر ڈویژن نا آپریشنل ویل آتے ٹی کمتی نا بابت خصوصی پرمان جاری کیک۔ تدوک آ دے وزیراعظم پاکستان عمران خان نا کماشی ٹی دیوان اٹی ایم ایل ون پروجیکٹ نا بابت پیش رفت مسنے۔ سی پیک نا رداٹ ایم ایل ون ڈٹ انا پیکج ون ءِ سی ڈی ڈبلیو پی و ایکنک آن منظوری کن زوت آن زوت پیش کننگک۔ دا پیکج اٹی نواب شاہ۔ روہڑی نا نیام اٹ ٹریک نا اپ گریڈیشن ہم اوارے۔