اسلام آباد۔ 29 جولائی (اے پی پی) دری معاملہانی کارگس ءِ جنوبی ایشیا ءُُ سارک ءِ ھاترا ڈائریکٹر جنرل ڈاکٹر محمد فیصل ءَ بھارتی ڈپٹی ہائی کمشنر گوراوو اہلووالیا ءَ را لوٹارینتگ ءُُ 28جولائی ءَ لائن آف کنٹرول ءِ سرا کیلر سیکٹر ءِ تہ بھارتی فوج ءِ نیمگا چہ سیز فائر ءِ ھلاپ ورزی ءُُ بلااشتعال تیر کاری ءِ ایراد جتگ، بھارتی تیرکاری چہ کٹ چار گاؤں ءِ نندوک 28 سالہ منیر حسین ءُُ مندھر میتگ ءِ نندوک زالبول رحمت جان شہید بوتگ ات وھدیکہ سئے شہری سک ٹپی بوتگ ات، بھارت ءِ قابض افواج لائن آف کنٹرول ءُُ ورکنگ باؤنڈری سرا یک شلءَ شہری آباتی ءَ را گرانیں سلاھاں نشانگ جوڈ کنگ انت اے رد 2017ء چہ برجاہ انت ءُُ تنیگہ بھارتی اردو ءِ نیمگا چہ سیز فائیر ءِ ھلاپ ورزی ءِ1970واکیہ دیما اتکگ ات۔ بھارت ءِ نیمگا چہ شہری آباتی ءَ را نشان جوڈ کنگ انسانی ھقانی ءُُ میاں اوستمانی کانودءِ ھلاپ ورزی انت ءُُ ایشی ءَ چہ دمگی امن ءُُ ایمنی ءَ را ھطرہ انت۔ ڈاکٹر محمد فیصل ءَ بھارتءِ سرا زور مان کتگ کہ آں 2003ء ءِ سیز فائر ءِ معاہدہ ءِ شرپ ءَ کن ایت،کنٹرول لین ءِ سرا بھارت ءِ نیمگا چہ کتگیں ھلاپی ءِ پٹ ءُُ پول ءَ کن ایت ءُُ وتی پوج ءَ را سیز فایر ءِ شرپ ءَ برجاہ دارایت تنکہ لائن آف کنٹرول ءُُ ورکنگ باونڈری ءِ سرا راستیں وڈ ءَ امن ءُُ ایمنی ءَ را برجاہ ایر کن ایت۔آہاں بھارت ءِ سرا زور مان کت کہ آں اقوام متحدہ ءِ فوجی مبصر گروپ ءَ را اقوام متحدہ ءِ سلامتی کونسل ءِ منگ نامہ ءِ ردا وتی کرد ادا کنگ ءِ اجازت ءَ دات۔
