اسلام آباد۔ 29 جولائی (اے پی پی) وزیراعظم نا سلاہکار واپار عبدالرزاق داؤد تون بنجائی وزیر موسمیاتی بدلی زرتاج گل اوڑدہی کرے۔ اوڑدہی ٹی چاگڑدی بدلی تون اوار چاگڑد دوست پالیسی تیا گپ و تران کننگا۔ اوڑدہی ٹی زرتاج گل پارے کہ چاگڑد ءِ ساف تخنگ کن پلاسٹک شاپنگ بیگ آتا کاریم اٹ اتنگ ءِ بندکروئی مریک۔ اوپارے کہ کاریم اٹ اتنگ نا قابل پچ والا شاپنگ بیگ نا مہم نا بناءِ اسلام آباد آن بناکرینن۔ بنجائی وزیر موسمیاتی بدلی پارے کہ نما غٹ انا کمک اٹ ہی دا مہم سرسہب مریک۔ اوڑدہی آن پد بنجائی وزیر زرتاج گل سلاہکار واپار، سیکرٹری واپارو سیکرٹری صنعت و پیداوارءِ ہم پچ والا شاپنگ بیگ تس۔ وزارت صنعت و پیداوار و واپار نا ملازم آتے ٹی کاریم اٹ اتنگ نا قابل شاپنگ بیگ بشخ وپانٹ کرے۔ داوخت آ سلاہکار واپار پارے کہ پلاسٹک بیگ انا کاریم اٹ اتنگ آن چاگڑد اٹی کچٹی ترندی اٹ تالان مننگ ءِ۔ اوپارے کہ وزارت موسمیاتی بدلی نا دا گام گیج سفت نا قابل ءِ۔ چاگڑد ءِ ساف تخنگ کن ننے اواری اٹ کوشست کروئی ءِ۔
