اسلام اقلیت آتا حق انا پورو پاسداری نا سبخ ءِ ایتک، ریاست مدینہ ٹی اقلیت آتے ہروڑنا مذہبی آجوئی و حق دوئی ئس
اسلام آباد۔ 29 جولائی (اے پی پی) بنجائی وزیر مذہبی امور بین المذاہب ہم آہنگی پیر نور الحق قادری پارینے کہ اسلام اقلیت آتا حق اناپورو پاسداری نا سبخ ءِ ایتک، ریاست مدینہ ٹی اقلیت آتے ہروڑنا مذہبی آجوئی و حق دوئی ئس، وزیراعظم عمران خان نا ویژن نا رداٹ اقلیت آتا ویل آتیان نن چشم پوشی کننگ کپنہ، پوسکن آ پاکستان اٹی غٹ اقلیت آک رکھ مریرہ۔ داخیال آتا درشانی ءِ او دوشنبے نادے آ ایوان صدر اٹی اقلیت آتا بابت اسہ خصوصی ءُ دود اسے آن تران کرسا کرے۔ دود اٹی صدر مملکت ڈاکٹر عارف علوی، وزیراعظم عمران خان، وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان تون اوار پارلیمنٹ نا باسک آک و اقلیتی برادری آن تعلق تخوک آ بندغ آک بھلو کچ اسے ٹی ساڑی ئسر۔ پیر نورالحق قادری پارے کہ دادود اٹی صدر و وزیراعظم نا ساڑی مننگ و اقلیت آتے کن ایوان صدر نا درگہ ءِ ملنگ داہیت انا شاہدی ءِ کہ عمران خان نا حکومت اقلیت آتے اخس اہمیت ایتک، دااسہ کلہو اس تننگ نا کوشست اسے۔ اوپارے کہ ہولی، دیوالی و بیساکھی مرے یا بہائی و کیلاش کمیونٹی نا مذہبی تہوار مرے نن دا دود آتے اڈ ایتنہ۔ دانا مسخت ءِ کہ بلاتمیز رنگ، نسل و مذہب پاکستان غٹ انا ءِ۔ اوپارے کہ نن غٹ پاکستانی اُن و بطور انسان ننا قدر اسٹ ءِ، ننا مذہب و آئین اقلیت آتا حق انا پاسداری نا حکم ایتک ولے قائد اعظم نا فرامین و فکر اقبال اقلیت آتا حق انا اہمیت ءِ پیدوار کیرہ۔ بنجائی وزیر پارے کہ وزیراعظم عمران خان ریاست مدینہ نا ہیت ءِ کیک، ریاست مدینہ ٹی اقلیت آتے ہروڑنا مذہبی آجوئی دوئی ئس و ریاست ہمو اقلیت آتا حق انا پاسداری آ مبنی ریاست اس ئس۔ اوپارے کہ مدینہ نا دامون ایمون رہینگوک آ مسیحی تا حق انا خیال ءِ تخنگا، اواقلیت آتے باور کرفے ہ دا ملک مسلمان، مسیح، ہندو، پارسی و بہائی تتون اوار غٹ انا ءِ، پوسکن آ پاکستان اٹی غٹ اقلیت آک رکھ مریرہ۔
