اسلام آباد۔ 29 جولائی (اے پی پی) احتساب عدالت جعلی بینک اکاؤنٹس ریفرنس اٹی مسکوہی صدر آصف علی زرداری و اونا ایڑھ فریال تالپور نا جسمانی ریمانڈ اٹی 10 دے انا ودکی ءِ کرسا اوفتے دُوارہ نیب انا حوالہ کرینے۔ آصف زرداری پارے کہ جسمانی ریمانڈ اٹی عئید آن پد اسکان نا ودکی کر ہرانا ورندی ٹی جج احتساب عدالت پارے کہ اسہ وخت اٹی اِراہفتہ غان زیات نا ریمانڈ تننگ مفک۔ دوشنبے نادے آ نیب جعلی بینک اکاؤنٹس کیس اٹی دزگیر مسکوہی صدر آصف علی زرداری و فریال تالپور ءِ جسمانی ریمانڈ پورو مننگ آ احتساب عدالت نا جج محمد بشیر نا عدالت اٹ پیش کرے، نیب پراسیکیوٹر نا کنڈآن دوبہ دارآتیان جاست وپاست کن اوفتا جسمانی ریمانڈ اٹی پین 10 دے انا ودکی نا خواست کننگا۔ سماعت اٹی آصف علی زرداری روسٹرم آ بس وپارے کہ جسمانی ریمانڈ اٹی عئید آن پد اسکان ودکی کے۔ جج احتساب عدالت پارے کہ عئید آن پد تخنگ کپنہ، اسہ وخت اٹی زیات آن زیات ریمانڈ اِراہفتہ نا مننگ کیک، نی تولنگ خواسہ تو تول۔ داوخت آ مسکوہی صدر نا وکیل لطیف کھوسہ ایڈووکیٹ پارے کہ دا عدالتی کارروائی ءِ بِننگ خواہک۔ عدالت نیب اناخواست ءِ منظور کرسا آصف زرداری و فریال تالپور نا جسمانی ریمانڈ اٹی 10 دے انا ودکی کرے و اوفتے پین جاست وپاست کن نیب اناحوالہ کرسا 8 اگست آ دُوارہ عدالت نا مون آ پیش کننگ نا حکم تس۔ عدالت بروک آ سماعت آ جاست وپاست اٹی پیش رفت آن معلومدار کننگ نا ہم حکم تسنے۔
