چیئرمین نیب جسٹس (ر) جاوید اقبال نا علاقائی بیوروتا آپریشن و پراسیکوشن ونگ انا کارکڑدگی نا جاچ دیوان آن تران

اسلام آباد ۔ 26جولائی (اے پی پی) قومی احتساب بیورو (نیب) انا چیئرمین جسٹس (ر) جاوید اقبال پارینے کہ نیب پاکستان ءِ کرپشن فری جوڑ کننگ کن تینا کوشست آتے دوگنا کرسا میگا کرپشن واءٹ کالر کرائم ءِ ایسر اسکان سرکننگ کن پرعزم ءِ ، نیب تدوک آ اسہ سال اٹی بدعنوانی نا 600 ریفرنس تعلقدار احتساب عدالت آتے ٹی دائر کرینے ۔ داخیال آتا درشانی ءِ او نیب ہیڈ کوارٹر اٹی نیب انا غٹ علاقائی بیوروزآپریشن و پراسیکوشن ونگ انا پانزدہ دے ئی کارکڑد نا جاچ انا بابت دیوان نا کماشی ءِ کرسا کرے ۔ دیوان ءِ پاننگاکہ نیب انا آپریشنل و پراسیکوشن ڈویژن نا غاوتا جانچ پڑتال انکوائری ، انوسٹی گیشن آتے کانود نا رداٹ چٹفنگ، احتساب عدالت ، ہائی کورٹس و سپریم کورٹ اٹی مقدمہ غاتا پیروی ءِ کننگ کن غٹ علاقائی بیورو تے کانودی کمک فراوان کننگ ءِ ۔ دیوان ءِ پاننگاکہ نیب مقدمہ غاتے ترندی اٹ چٹفنگ کن غاوتا جانچ پڑتال، انکوائری ، انوسٹی گیشن و احتساب عدالت آتے ٹی مقدمہ غاتے دائر کننگ کن دہ تُو انا مقرر کرینے تانکہ میگا کرپشن مقدمہ غاتے ترندی اٹ ایسر اسکان سرکننگ کن چیلنج آتون مون تننگ مرے ہراڑکن نیب آفیسر آک پاکستان ءِ کرپشن فری اس جوڑ کننگ کانود نار داٹ دے و نن خواری کننگ ءُ ۔ اوپارے کہ نیب سینئر سپروائزر ی آفیسر آتا اجتماعی دانش آن فائدہ ہرفنگ کن مشترکہ جاست وپاستی ٹیم انا نظام اس پیدوار کرینے ہراڑان نئے بیرہ نیب انا کارکڑدگی ٹی گچینی بسنے بلکن اسہ بندغ اس ہم نیب انا جاست وپاست آ اثرانداز مننگ کپک ۔ دا گام گیج نا سوب آن نیب تدوک آ اسہ سال اٹی بدعنوانی نا 600 ریفرنس تعلقدار احتساب عدالت آتے ٹی دائر کرینے ۔ چیئرمین نیب غٹ انوسٹی گیشن آفیسر آتے پارت کرینے کہ او ہر مقدمہ نا کیس ڈائری تیار کیر، ہرا بھاز اہم ءِ و اوفتے انکوائری و انوسٹی گیشن نا آب ءِ کانود نا رداٹ گچین کننگ اٹ کمک رسینگک ۔ دیوان اٹی دا ہم پاننگانے کہ چیئرمین نیب جسٹس جاوید اقبال نا پارت آ تجربہ کار لیگل کنسلنٹس و اسپیشل پراسیکوٹر تعینات کرسا پراسیکوشن ڈویژن نا تشکیل نو کننگانے ۔