وزیر ریلوے شیخ رشید احمد نا نالہ لئی نا خڑ ک انا علاقہ غاتا دورہ، ممکنہ نوکاپی حالیت آتون مون تننگ کن انتظامیہ و تعلقدار ادارہ غاتے الرٹ مننگ نا پارت

اومیت ءِ لئی ایکسپریس وے اینڈ فلڈ چینل ڈٹ آ کاریم ہندا سال بناکیک، گپ و تران

اسلام آباد ۔ 25جولائی (اے پی پی) وزیر ریلوے شیخ رشید احمد راولپنڈی اسلام آباد اٹی جاری پِرتا سوب آن نوکاپی حالیت آتا جاچ ءِ ہلنگ کن پنچ شنبے نادے آ نالہ لئی نا خڑک انا علاقہ غاتا دورہ ءِ کرے و گوالمنڈی پول راولپنڈی آن نالہ لئی ٹی ممکنہ طغیانی نا جاچ ءِ ہلک ، شیخ رشید احمد نوکاپی حالیت آتون مون تننگ کن راولپنڈی انتظامیہ و تعلقدار ادارہ غاتے الرٹ مننگ نا پارت کرے ۔ بنجائی وزیر ریلوے شیخ رشید احمد پارے کہ محکمہ موسمیات نا رداٹ اینخو نا سال بشام اٹی خدوناسال آن زیات پِر مننگ کیک ۔ راولپنڈی شار ءِ نوکاپی حالیت آتون مون تروک مننگ کیک ۔ راولپنڈی شار ءِ نوکاپی حالیت آتیان بچفنگ کن نالہ لئی ایکسپریس وے اینڈ فلڈ چینل نا جوڑ کننگ المی ءِ ۔ بطور فوکل پرسن لئی ایکسپریس وے اینڈ ، فلڈ چینل کن بنجائی و پنجاب حکومت تون پدریسہ رابطہ ٹی اُٹ ۔ 80 ارب نا دا ڈٹ اکن جہانی کمپنیک ہم است خواہی نا درشانی ءِ کرینو ۔ اومیت ءِ ہندا سال دا ڈٹ آکاریم بناکیک ۔ اوپارے کہ سواں پول آن پشاور موڑ اسلام آباد اسکان بیست و شش (26) کلومیٹر مریس نالہ لئی ایکسپریس وے آن راولپنڈی شار ءِ اسہ پوسکن ءُ دروشم اس ملک ۔ ٹرانسپورٹ و کاروبار نا گچین آسراتی دوبریک ۔