وزیراعظم عمران خان نا امریکہ غان پدی بننگ آ اسلام آباد بالی پٹ آ پارٹی راہشون و کارندہ غاتیان تران

اسلام آباد ۔ 25جولائی (اے پی پی) وزیراعظم عمران خان پارینے کہ دورہ امریکہ غان پدی بننگ آ فقید المثال بیابخیری ءِ خنسا اودے لگنگ ءِ کہ او ورلڈ کپ ءِ کٹانے پدی بسنے، وعدہ کیوہ کہ قوم ءِ مایوس کپرہ، دُز و داڑیل آتا پلوک آ پیسہ غاتے پدی اتسا الس آ خڑچ کینہ، ننے ملک انا ادارہ غاتے سہی کروئی ءِ، ہمودے مراف ہراتم دا ملک دنیا نا عظیم ءُ ملک اس مریک تینا قوم ءِ کس اسے نا مون آ کاٹم ءِ شیف کننگ کن الیپرہ ۔ چارشنبے و پنچ شنبے نا نیامی نن دورہ امریکہ غان پدی بننگ آ اسلام آباد بالی پٹ آ پارٹی راہشون و کارندہ غاتیان تران کرسا وزیراعظم پارے کہ فقید المثال بیابخیری آ او غٹ کارندہ غاتا منت واری ءِ ہرفک، اودابیابخیری کننگ آ خنسا اودے ہندن لگنگ ءِ کہ او ورلڈ کپ ءِ کٹسا بننگ ءِ ۔ اوپارے کہ اللہ تعالیٰ ننے 27 روچہ غا پاکستان نا ٹیکی ءِ تس و دا اللہ تعالیٰ نا خاص ءُ ملک اسے و دنیا ٹی دا اسٹ انگا ملک ءِ ہرا اسلام نا پن آ جوڑ مس ۔ اوپارے کہ نن بایدے داگیرام کپن کہ ننے اسہ عظیم ءُ قوم اس جوڑ مروئی ءِ و ننے ہمو قوم جوڑ مروئی ءِ ہرانا تغ ءِ علامہ اقبال و قائد اعظم ئسک خناسر ۔ اوپارے کہ نئے تو او وخت اس کس اسے نا مون آ مون ءِ شیف کرینے و نئے قوم ءِ کس اسے نا مون آ مون ءِ شیف کننگ کن ہلک ۔ اوپارے کہ ننے خوددار ءُ قوم اس جوڑ مروئی ءِ ۔ خواجہ اکرم صلی اللہ علیہ وآلہ وسلم مدینہ ناریاست نا اصول آتا بنداو آ جوڑ کریسس و کنا جہد ءِ کہ پاکستان ءِ ہمو اصول آتا رداٹ اسہ عظیم ءُ ملک اس جوڑ کیو ۔ اوپارے کہ بروک آ دے تیٹی پاکستان ءِ مشکل حالیت آتیان کشنہ و دُز و داڑیل آک ہراوڑ نا حالیت آتے ہلار و داملک اٹی ادارہ غاتے ہرا اوفک نسخان تے تسر، ننے اوفتے سہی کروئی ءِ، ایف بی آر ءِ ہم ننے سہی کروئی ءِ و تینا ملک ءِ نت تیا سلفوئی ءِ ۔ اوپارے کہ ننے ملک انا تہہ آن پیسہ غاتے یکجا کروئی ءِ، ہسپتال جوڑ کروئی ءِ الس ءِ کنوئی ءُ ساف دیر تروئی ءِ ۔ اوپارے کہ دنیا بیرہ ہمو قوم انا عزت ءِ کیک ہرا تینا عزت ءِ کرفک و دنیا نا مون آ دوتوروک آتا عزت مفک ۔ اوپارے کہ دا دُزو داداڑیل آک حکومت کتورہ تو پاکستان اسہ عظیم ءُ ملک اس اینو اسکان مسکہ ۔ اوپارے کہ تدوک آ اسہ سال اٹی نن حالیت آتے گچین کننگ کن گام گیج کرینن ۔ اسہ سا ل اس مست الس ننے گچین کاری تیٹی سرسہبی ترفے و پاکستان تحریک انصاف ءِ اقتدار ترفیر ۔ اوپارے کہ نم تون وعدہ کیوہ کہ وخت اس ہم نمے مایوس کپرہ ۔ ملک ءِ اسہ سال اٹی ننے ملک ءِ سنبھالنگ اٹ لگانے ، دُز و داڑیل آک پیسہ غاتے دُزی کرسا پیشن نا ملک آتیا دریر و اوفک ملک ءِ وام و دیوالیہ کریر اوفتا احتساب ءِ نن کینہ ۔ اوفتے جیل تیٹی بند کینہ ۔ اوپارے کہ امریکہ و دیکی دنیا تون ہم نن ہیت کرینن کہ ملک آن ہرا پیسہ غاتے دُزی کرسا دننگانے ، اوفتا پیسہ غاتے پدی اتنگ کن نن تون کمک کیر ۔