اسلام آباد ۔ 23 جولائی (اے پی پی) مزن وزیر عمران خان ءَ گوشت کہ پاکستان امریکہ ءِ گوما وت مہ وتی یکوئی ءُُ براتی ءِ رد ءَ دوستی ءُُ یکوئی ءِ واھشت دار انت، پاکستان ءِ جمہوری گچین بوتگیں حکومت ءُُ پاک ارد یکیں جاھ ءَ اوشتاتگ اَنت، اُردی سروک گچین بوتگیں حکومت ءِ گوما اوشتاتگ اَنت، دوئیں ملک آنی اوگان جیڈھ ءِ سر ءَ یکیں بن گپ انت، اوگان صدارتی گچین کاری ءَ طالبان آنی شریکداری ضلوری انت، پاکستان ءَ گور آناں سرج میں آزاتی ءُُ پاسبانی است انت ۔ آواناں کانود ءِ رد ءَ بروبری شہری ھک گون انت، کشمیر ءِ جیڈھ کشمیری الس آنی واھشت آنی رد ءَ گیواری کنگ لوٹ ایت، پاکستان ءِ میڈیا برطانوی میڈیا ءَ چہ گیش آزات انت، پاکستان ءَ سنسرشپ نیست، ما میڈیا واچ ڈاگ‘‘ ءَ را مھکم کناں ، معاشی گوناپکاری ، گریبی ءِ ھلاسی ءُُ یک وڑیں زانشتی نظام مئے اولی کار آنی تہ ءَ انت، اے وھد ءَ پاکستان امریکہ ءِ گوما گہتریں یکوئی است ، مئے حکومت ءِ اول سرئی کار توا میں ھمساھگانی گوما جوانیں یکوئی ءِ برجائی انت، حکومت ءِ کوپگ آں زوگ ءَ گوں بھارت ءَ را سول ءُ تران ءِ پیشوکی گوشتگ، پاکستان ءِ نیام ءَ بنیاتی جیڈھ کشمیر ءِ جیڈھ انت، پڑ ءِ دیمروئی ءِ واستہ ایمنی سک کموک انت، امریکہ ءِ گوما گہتریں یکوئی گون، اوگانستان ءَ ایمنی ءِ واستہ سرج میں کم کنگ ءَ آں ، گوستگیں سروک آنی کرپشن ءِ سبب ءَ ملک دیووالیہ ءَ شتگ بوتگ، منی دیم پہ دیمی گوں ھما آں بوتگ ھما کہ سپریم کورٹ ءَ سسیلین مافیا نامینگ بوتگ انت ۔ آ سئے شمبے ءِ روچ ءَ امریکی تھنک ٹینک ’’انسٹی ٹیوٹ آف پیس‘‘ ءَ گشتانک ءِ ساھت ءَ گوشگ ءَ انت ۔ مزن وزیر ءَ گوشت کہ پاکستان امریکہ ءِ گوما وت مہ وتی شرپ ءُُ ازت ءُُ بروبری ءِ بنیات ءَ یکوئی کنگ لوٹ ایت، اے وھد ءَ پاکستان ءِ امریکہ ءِ گوما جوانیں یکوئی ءُُ دوئیں ملک اوگان جیڈھ ءِ سر ءَ یکیں بنگپ ءَ دار انت، اوگان جیڈھ ءِ گیواری ءِ آسانیں گیواری نیست انت پدا ھم پاکستان ، اوگانستان ءُُ امریکی یکجائی ءَ اے جیڈھ ءِ گیواری ءَ کت کناں ۔ آئی ءَ گوشت کہ آزاتیں ملک ءَ پیداک بوھوکیں اولی باھند ءِ تہ ءَ اوں ، مئے مات پت نوک بنگیج بوھوکیں نظام ءِ زمانگ ءَ پیداک بوتگ انت ۔ آئی ءَ گوشت کہ پاکستان ءَ 60ءِ زمانگ ءَ ترندی ءَ گوں دیمروئی بوتگ، 70ءِ زمانگ ءَ چہ پد پاکستان ءِ جاور ھراب بوھان بندات بوتگ اَنت، 70ءِ زمانگ ءَ پاکستان ءِ صنعتی پیداوار چار ایشیئین ٹائیگرز ملک آنی کچ ءُُ کساس ءَ بوتگ، اے وھد ءَ مئے ملک ءِ سِل تریں کار ءُُ ھرابی لٹ ءُُ پُل انت ۔ آئی ءَ گوشت کہ اوگانستان ءِ آیوکیں نوکیں گچین کاری ءَ طالبان ءِ ھواری المی انت ۔ مزن وزیر ءَ گوشت کہ پاکستان مشکلیں جاور آنی تہ ءَ سعودی عرب ءُُ متحدہ عرب امارات ءِ شگر ءُُ منت وار انت ۔ ایران امریکہ کشاں چیل ءِ ھوالگ ءَ آئی ءَ گوشت کہ ایران کشاں چیل پریکیں ملک آنی جیڈھ آنی گیواری باید انت بہ بیت، ھمساھگیں ملک آنی بستار ءَ چہ پاکستان ءِ اے کشاں چیل ءَ چہ گیشاں چہ گیش آماچ بوت کنت ۔ مزن وزیر ءَ گوشت کہ مئے حکومت ءِ اول سرئی کار انت کہ توا میں ھمساھگیں ملک آنی گوما جوانیں یکوئی برجا بہ بیت، پڑ ءِ دیمروئی ءِ واستہ سک باز جوان انت ءُُ المی انت ۔ آئی ءَ گوشت کہ امریکی صدر ٹرمپ ءَ گوں گند ءُُ نند ءَ چہ پیسر منا بازیں شور ءُُ سلاھ دیگ بوتگ، امریکی صدر ءَ گوں گند ءُُ نند باز جوانیں تجربت ءِ بوت، ھما رنگ ءَ کہ مئے مہمانوازی کنگ بوت ایش لاءک ءِ توسپ ءُُ ستا انت ۔ آ گوست ءِ تران ءَ کنان ءَ گوشت کہ پاکستانی الس آں پھم اتگ کہ آ امریکی جنگ ءَ گوں ھوار بوتگ اَنت، اوگان جنگ ءِ ما باز نیاد داتگ، اربانی ڈالر ءِ تاوان رستگ، ما اے جنگ ءَ 70ہزار جان آنی کربانی داتگ، ایشی ءَ ابید دوئیں ملک آنی نیام ءَ نہ وشیں موسمی جاور بوتگ اَنت، منی مُدام اے بن گپ بوتگ کہ اوگان جیڈھ ءَ را زور ءِ مٹ ءَ سول ءُُ تران ءِ سر ءَ گیوار کنگ بہ بیت، امریکہ ءَ درستیں مردم ھمے پھمگ ءَ بوتگ اَنت کہ اوگان جنگ ءِ گیواری اُردی رپک ءَ چہ بوت نہ کنت ۔ امریکی الس گوں اوگان راجدپتر ءِ بابت ءَ سک باز مالوم داری نہ انت ۔ آئی ءَ گوشت کہ اے وھد ءَ پاکستان ءِ امریکہ ءِ گوما جوانیں یکوئی است، دوئیں ملک آنی اوگان جیڈھ ءِ سر ءَ ھمگونگیں بن گپ ات ۔ اوگان جیڈھ ءِ آسانیں گیواری نیست انت پدا ھم یکجا بوت ءُُ ایشی ءِ گیواری ءَ کت کناں ۔ آئی ءَ گوشت کہ سیاسی جنگ ءَ مناں سما بوت کہ سیاسی گل آنی مٹ ءَ گوں مافیا ءَ جنگ کنگ ءَ آں ، سپریم کورٹ ءَ ھم پیسریگیں سروک آناں سیسیلین مافیا ءِ لقب داتگ، منا پاکستان ورنا آنی ٹوھیں کساسے ھمبراھ داری ءُُ کمک گون انت ۔
