اوورسیز پاکستانی تے زند اٹی بھاز خواری کروئی تمک، اوورسیز پاکستانیک ملک انا نہادی میرات ءُ
واشنگٹن۔ 24جولائی (اے پی پی) وزیراعظم عمران خان پارینے کہ قومی وقار و غیرت آ سمجھوتہ کننگپ، عزت نفس بھاز بھلو گڑاسے، مدینہ نا ریاست ناروشنا اصول آتیا عمل کرسا سرسہبی دوئی کننگ کینہ، اوورسیز پاکستانی تے زند اٹ بھاز خواری کروئی مریک، اوورسیز پاکستانیک ملک انا نہادی میرات ءُ۔ داخیال آتا درشانی ءِ او واشنگٹن اٹی تحریک انصاف نا راہشون و کارندہ غاتیان تران کرسا کرے۔ وزیراعظم پارے کہ کرکٹ گوازی کروک آ ملک آتے ٹی اوورسیز پاکستانی تتون رابطہ مسکہ، ای اوورسیز پاکستانی تا غٹ آن زیات عزت ءِ کیوہ اوفتے زند اٹی بھاز خواری کروئی تمک۔ اوپارے کہ اوورسیز پاکستانیک ملک انا نہادی میرات ءُ، پیشن نا ملک رہینگوک آ پاکستانیک خواری اٹ دنیا ٹی پاکستان نا پن ءِ روشن کیرہ۔ عمران خان اوورسیز پاکستانی تے پارے کہ نمے ٹی عزت نفس و خوداعتمادی بایدے مرے، خوداعتمادی آن انسان بھلا بھلا سرسہبی تے دوئی کننگ کیک۔ وزیراعظم کرکٹ مقابلہ غاتا ذکرءِ کرسا پارے کہ مقابلہ غان مست کس اسے تینے آن طاقتور سرپننگ کننگ سرسہبی نا کسر اٹ اڑاند مریک۔ پاکستانی تیٹی خوداعتمادی نا کمتی ءِ۔ وزیراعظم پارے کہ حکمرانک پیشن نا ملک رہینگوک آ پاکستانی برادری تون اردو اٹ بایدے ہیت کیر۔ اوپارے کہ قومی وقار و غیرت آ سمجھوتہ کننگپ۔ عزت نفس بھلو گڑاسے، مدینہ نا ریاست نا روشنا اصول آتیا عمل کرسا سرسہبی دوئی کننگ کینہ۔ سچ بھلو طاقت اسے، اللہ سُچا پاروک آتے سرسہبی ایتک، ایمانداری و سچائی نا مدام دنیا ٹی عزت مریک۔ وزیراعظم پارے کہ کنا خواہش ءِ کہ سچ و بہادری پاکستانی تا دنیا ٹی پہچان مرے۔ اوپارے کہ پاکستانی قوم اسہ بہادر و باصلاحیت ءُ قوم اسے، صدر ٹرمپ ہم پاکستانی تا ذہانت و لائخی تے امنا کرینے۔
