اسلام آباد۔ 24جولائی (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ وزیراعظم عمران خان نا کنڈآن دورہ امریکہ ٹی کشمیر نا ویل اتون اوار اہم قومی معاملہ غاتیا دوٹوک و جیرت مندانہ موقف نا جہانی برادری ستاءِ کرینے۔ اسہ نجی ٹی وی چینل اسے تون گپ و تران کرسا خصوصی کمکار پارے کہ کشمیر نا ویل آ ثالثی نا بابت امریکی صدر ڈونلڈ ٹرمپ نا بیان آ بھارتی میڈیا ٹی صف ماتم اس تالان مسنے۔ اوپارے کہ وزیراعظم عمران خان جتا معاملہ غاتیا جیرت مندانہ موقف نا بارواٹ غٹ تعلقدار اسٹیک ہولڈر آتے پت اٹ ہلک۔ اسہ سوج اسے نا ورندی ٹی اوپارے کہ ملک انا غٹ سرکڑدہ غاک نیشنل ایکشن پلان آ امناءُ۔ حافظ سعید ءِ نیشنل ایکشن پلان آ عملدرآمد کرسا دزگیر کننگا۔ فردوس عاشق اعوان پارے کہ پاکستان دہشت گردی نا برخلاف جنگ اٹی لازوال قربانی تسنے۔ کم و ود 70 ہزار آن زیات بندغ تینا جان تے ندر کرینو۔ فردوس عاشق اعوان پارے کہ حکومت آجوئی اظہار آ پبی باور کیک و دا بابت غٹ ادارہ غاتے سوگو کیک۔ اوپارے کہ اپوزیشن سیاسی پوائنٹ سکورنگ کن حکومت آ تنقید کننگ ءِ۔
