اسلام آباد۔ 24جولائی (اے پی پی) وزیراعظم نا خصوصی کمکار حوالکاری و شینکاری ڈاکٹر فردوس عاشق اعوان پارینے کہ وزیراعظم عمران خان نا امریکہ نا دورہ نا سرسہبی تیان ہاؤس آف شریف نا ارمان تے دیر درینے، شہباز شریف نا بیان کپتان نا برخلاف رِیس انا درشانی ءِ، امریکہ ٹی پاکستانی تا تاریخ نا غٹ آن بھلا جلسہ ءِ خنار اوفتے برداشت متو، عمران خان کشمیری تا وکیل مرسا مون آ بس، کشمیر نا جھیڑہ نا ایسری نا اہمیت ءِ پبی وڑاٹ تالان کرے۔ چارشنبے نادے آ تینا ٹویٹ اٹی ڈاکٹر فردوس عاشق اعوان پارے کہ شہباز شریف کشمیر آ سیاست کننگ آن مست تینا خن تے ملسا سید علی گیلانی نا بیان ءِ خوانوسس، کشمیری تا قائد خوشی نا درشانی ءِ کننگ ءِ، کم ظرف سوچ اتون بس آتے ٹی سفر کننگ نا تنز خلنگ نا جاگہ غا عمران خان نا سادگی و کفایت شعاری نا مثال آن ہیل کروسر۔ اوپارے کہ شہباز شریف صاحب، نی غٹ آن بھلا شعبدہ باز اُس ہرا لندن اٹی تو روڈ آتے پند اٹ ناپ کیسہ ولے پاکستان آبننگ تون پروٹوکول نا نشہ نا گواچی مریسہ، اوعمران خان آن عداوت و بغض اٹ اخس الس ءِ گمراہ کیک، اوفتا محبت عمران خان کن ودک۔ اوپارے کہ ایرینا ون نا السی جوش و جوزہ، والہانہ بیا بخیر و صدر ٹرمپ اتون سرسہب اوڑدہی اوفتے تغ آن بٹینے۔ اوپارے کہ شہباز شریف نا وزیراعظم نا دورہ امریکہ نا بابت بیان اونا پست سوچ و کرپٹ خصلت نا آئینہ دار ءِ۔
