وزیراعظم عمران خان و صدر ڈونلڈ ٹرمپ نا اوڑدہی ہڑتوم آ ملک آتا تین پہ تینی تعلقداری تیٹی اسہ پوسکن ءُ دور اسے نا بناءِ
واشنگٹن۔ 23جولائی (اے پی پی) وزیر خارجہ شاہ محمود قریشی پارینے کہ وزیراعظم عمران خان و صدر ڈونلڈ ٹرمپ نا وائٹ ہاؤس اٹی اوڑدہی ہڑتوم آ ملک آتا تین پہ تینی تعلقداری تیٹی اسہ پوسکن ءُ دور اسے نا بناءِ، ہڑتوم آ راہشون تا نیام اٹ مسہ گھنٹہ غان زیات نا اوڑدہی آن پد پاکستانی میڈیا ءِ بریفنگ اٹ وزیر خارجہ شاہ محمودقریشی پارے کہ وائٹ ہاؤس اٹی پاکستان و امریکہ نا بڑزکو سرکڑدہ غاتا نیام اٹ مروک آ اوڑدہی تین پہ تینی تعلقداری تیٹی پوسکن ءُ دور اسے نا بناءِ، اوڑدہی ٹی امریکی صدر ڈونلڈ ٹرمپ پاکستان و بھارت نا نیام اٹ بنداوی جھیڑہ کشمیر نا ویل آ ثالثی نا پیش کش کرینے۔ امریکی صدر امریکہ و طالبان تا نیام اٹ ہیت وگپ اٹی کمکاری آ پاکستان نا حکومت نا ستاءِ کرینے۔ وزیر خارجہ کشمیر نا ویل آ امریکی صدر ڈونلڈ ٹرمپ نا موقف ءِ بے کچ پیدوار گوندسا پارے کہ مستین اٹی دانا مثال ملیپک۔ اوپارے کہ امریکہ پاکستان تون وسیع البنداو و پائیدار شریداری نا خواہندار ءِ۔ امریکہ وپاکستان ہڑتوم آ ک اوغانستان اٹی امن خواہرہ۔ وزیر خارجہ امریکی صدر نا دا بیان نا خاص وڑاٹ ذکر ءِ کرے ہراٹی اوپارے کہ او پاکستان تون زبردست واپاری تعلقداری خواہک و او وزیراعظم پاکستان نا ستاءِ کرسا پارے کہ پاکستان تون امریکہ نا شریداری شاندار مریک۔ امریکی صدر داہیت انا ہم ستاءِ کرے کہ پاکستان نا ساڑی سیاسی حکومت و سلہہ بند فوج اسہ پنہ غاٹو۔ وزیر خارجہ شاہ محمود قریشی پارے کہ امریکہ اوغان امن عمل اٹ پاکستان نا کڑد انا ستاءِ کرینے و داعزم انا درشانی ءِ کننگاکہ دا عمل ءِ مون آ دروئی ءِ۔ پاکستان اولیکو دے آن اوغانستان اٹی امن نا مخ تف ءِ۔ سویلی ایشیا ٹی امن کن پاکستان و بھارت اٹی بھاز بھلو تپہ اس امن نا مخ تف ءُ ولے اونا کسر اٹی اڑاند کشمیر نا ویل ءِ۔ وزیر خارجہ شاہ محمود قریشی پارے کہ وزیراعظم عمران خان امریکی صدر ڈونلڈ ٹرمپ اتون اوول آفس اٹی مروک آ اوڑدہی ٹی کشمیر نا ویل انا تاریخ آن معلومدار کرے۔ اوامریکی صدر ءِ بھارت نا کنڈآن کشمیری تیا کروک آ بیدادی و پدریسہ انسانی حق انا خلاف ورزی تیان معلومدار کرے۔ شاہ محمود قریشی پارے کہ ننا امریکہ ٹی وزیر خارجہ نا کہول آ و صدر آتا کہول آ اوڑدہی مرسا کرے ولے معاملہ غاتے ٹی تین پہ تینی کمکاری نا داخہ پیدوار عندیہ، مہالو اسہ وخت اس ہم خننگتنے، اگہ نم صدر ڈونلڈ ٹرمپ نا لوز آتیا غور کبو تو معلوم مریک کہ بھارت ہم داخواہک کہ کشمیر نا ویل ایسر مرے، اگہ کشمیر نا ویل ایسر مریک تو اونا اثرآک مچ آ ڈیہہ نا تعمیر و ترقی نا دروشم اٹ نظر بریرہ، صدر ڈونلڈ ٹرمپ نا جند جموں و کشمیر نا ویل آ مصالحت نا پیش کش کرینے، مستین اٹی ننا ہڑتوم آ کنڈآتا تعلقداری تیٹی شیف بڑزی برسا کرے، دا اوڑدہی ٹی پاکستان و امریکہ نا نیام اٹ واپار آہم ہیت مس ہراٹی صدر ڈونلڈ ٹرمپ ہڑتوم آ کنڈآتا واپار ءِ دہ بیست گنا ودکی نا است خواہی نا درشانی ءِ کرے۔ زرکاری ٹی ودکی کن چندی کہول آ ننا اوڑدہی مس، نن دا اوڑدہی تیٹی امریکی سرکڑدہ غاتیا پیدوار کرینن کہ نن ایڈ آخا ٹریڈ خوانہ، ننا ورناتے روزگار نا گرج ءِ ہراڑکن زرکاری نا کچ اٹی ودکی المی ءِ، توانائی نا بشخ اٹی کمکاری آہم ہیت وگپ مس، دفاعی و سیکورٹی کمکاری آ ہیت وگپ مس۔ امریکی سرکڑدہ غاتون اینو نا اوڑدہی ٹی دفاعی کمکاری نا بحالی نا عندیہ ہم ملانے۔ پاکستان تحریک انصاف نا حکومت پبی کوشست کرسا امن و ایمنی ءِ بحال کرے ہراٹی مسکوہی فاٹا نا گچین کاری تیٹی مچ آ دنیا خنا۔ صوبہ خیبر پختونخوا نا مسکوہی قبائلی ضلع غاتے ٹی اولیکو وار 16نشست آتے ٹی پرامن گچین کاری مس ہرافتے ٹی نرینہ غاتون اوار اوار نیاڑیک ہم پبی بشخ ہلکر۔ دا گچین کاری تیاہچ ءُ اعتراض اس کننگتو۔ دا پاکستان تحریک انصاف نا اسہ بھلو سرسہبی اسے ہرا مچ آ دنیا نا مون آٹے۔ خیبر پختونخوا نا مسکوہی قبائلی ضلع غاتے ٹی کیہی آزاد اومیتدار تحریک انصاف نا پلیٹ فارم آن الیکشن کننگ نا است خواہی نا درشانی ءِ کریر ولے اوفتے ٹکٹ تننگ کتون ولے داسہ ننے اومیت ءِ کہ ننا پنچ نشست آتے ٹی پین پنچ اومیتدار اوار مریرہ۔ امریکی صدر ڈونلڈ ٹرمپ اتون مروک آ اوڑدہی ٹی دا معاملہ غاہم گپ و تران مس۔ وزیراعظم عمران خان و امریکی صدر ڈونلڈ ٹرمپ نا اوڑدہی مسکوہی ٹی ہڑتوم آ ملک آتا راہشون تا نیام اٹ مروک آ اوڑدہی تیان اینک تھچس اٹی صدر ٹرمپ کل انا مون آ وزیراعظم عمران خان نا سفت ءِ کرے، اوڑدہی ٹی ہڑتوم آ راہشون تا نقطہ نظر اٹی بھاز جوان ءُ مطابقت اس ئس۔
