اسلام آباد۔ 23جولائی (اے پی پی) وزیر مملکت موسمیاتی بدلی زرتاج گل پارینے کہ وزیراعظم عمران خان نا دورہ امریکہ سرسہب مس، مچ آ دنیا نا خنک ہمو دورہ غا ئسر، عدالت نا فیصلہ غان پد ہم اسلام آباد مرغزار نا چارج ءِ وزارت موسمیاتی بدلی نا حوالہ کتو، اگہ چک و ساہدار تے گڑاس مس تو انتظامیہ زموار مریک کاسمیٹکس جوڑ کروک آ 57کمپنی تیان 54نا مصنوعات آتے ٹی مرکری نا مضر صحت مقدار خننگانے۔ تینا ڈٹ آتے ٹی ترندی اتسا وزارت 46 درسد خڑچ آتے کم کرینے، 14 اگست آن پلاسٹک بیگ آتاکاریم اٹ اتنگ آ پابندی خلنگ انگ ءِ دا بابت ضلعی انتظامیہ نن تون آن بورڈ مریک۔ سے شنبے نادے آ داڑے پریس کانفرنس آن تران کرسا اوپارے کہ وزیراعظم عمران خان نا دورہ امریکہ سرسہب مسنے، مچ آ دنیا نا خنک اونا دا دورہ غا ئسر، او پاکستان و مسلمان تے کن کیس کننگ ءِ۔ اوپارے کہ 14اگست آن بنجائی دارالحکومت اٹی پلاسٹک بیگ آتا کاریم اٹ اتنگ آ پابندی خلنگ انگ ءِ۔ داوخت آ اسہ کساس اسے نا رداٹ بنجائی دارالحکومت اسلام آباد اٹی 20 لکھ بندغ رہینگ انگ ءُ ہرا اندازاََ ہردے مسٹ آن چار بیگ فی کس کاریم اٹ اتیرہ ہرا بے کچ گڑتی نا عمل اسے۔ اوپارے کہ بنجائی دارالحکومت نا غٹ کاروباری ہند آتا دوکاندار آتے معلومدار کننگانے، اگہ کس اس خلاف ورزی کرے تو اودے بنائی وڑاٹ اسہ لکھ، دُوارہ خلاف ورزی کننگ آ 2لکھ وخت اس کہ مسٹ میکو وار خلاف ورزی کننگ آ 5لکھ روپئی جرمانہ کننگک، دا بابت ضلعی انتظامیہ نن تون آن بورڈ ءِ۔ اوپارے کہ شاپنگ بیگ آتا کاریم اٹ اتنگ نا حوصلہ شکنی کن میڈیا، سول سوسائٹی، این جی او و ایلو ادارہ غاک نن تون تفر۔ زرتاج گل پارے کہ اسلام آباد ہائی کورٹ اسلام آباد مرغزار نا فیصلہ ءِ ننا وزارت نا حق اٹی تسنے وخت اس کہ ہموجاگہ نا انتظامیہ ننے چارج ءِ تننگ کن تیار افس اوفتے تنبیہ کننگ اُٹ کہ اگہ مرغزار اٹی ساڑی چک و ساہدار تے گڑاس مس تو اوفتا زموار مرغزار انتظامیہ مریک۔ اوپارے کہ اسلام آباد مرغزار آ حکومت سالانہ 11کروڑ روپئی خڑچ کننگ ءِ وخت اس کہ اونا کٹیا 3 کروڑ 30 لکھ ءِ۔ اوپارے کہ نن دا ویل ءِ پانی پت انا جنگ انا وڑ کننگ خواپنہ و انتظامیہ غا پید وار کننگ خوانہ کہ او مرغزار نا چارج ءِ وزارت موسمیاتی بدلی نا حوالہ کے۔ وزیر مملکت پارے کہ اینو کل ننا زالبول آتے ٹی رنگ ءِ پیہن کننگ کن کاسمیٹکس نا کاریم اٹ اتنگ بھاز زیات مسنے و او رنگ ءِ پیہن کروک آ کریم تا بے تحاشہ کاریم اٹ اتنگ ءُ، وزارت نا سروے نا رداٹ پاکستان اٹی 57ہندی و ملٹی نیشنل کمپنی تا ٹیسٹ ءِ کرفنگانے ہرافتے ٹی 54کمپنی تا مصنوعات آتے ٹی مرکری نا مقدار مضر صحت حد اسکان ءِ۔ اوپارے کہ نن موٹرویز و شاہراہ تا ماس آ درخت خلنگ نا ڈٹ اسے نا بناءِ کریسن ہراڑا سرسہبی اٹ کاریم برجاءِ، بروک آ وخت کراچی، حیدرآباد، سکھر موٹروے آ درخت خلنگک تانکہ مسافر آتے سرسوز چاگڑد اس دوبننگ کے۔ اوپارے کہ وزارت دا ہیت انا ہم ڈٹ بندی ءِ کننگ ءِ کہ مارگلہ نیشنل پارک انا چارج ہم وزارت ءِ ملے۔ اوپارے کہ وزارت تینا ڈٹ آتے ٹی ترندی ایسونے و وزیراعظم نا کلین اینڈ گرین ڈٹ آ کاریم ترندی اٹ برجاءِ و مچ آ ملک اٹی نیال خلنگ انگ ءِ وخت اس کہ وزارت تینا خڑچ آتے ٹی کمتی کرسا 46 درسد بچت کرینے۔ اوپارے کہ موسمیاتی و چاگڑدی بدلی تیا وخت آ گام گیج کپننگ نا سوب آن ملک ءِ سالانہ 14 ارب روپئی نا نسخان مننگ ءِ ہرا ننا ملک انا جی ڈی پی نا 5 درسد ءِ۔ پریس کانفرنس نا ایسر آ وزیر مملکت صحافی تیٹی پچ آتیان جوڑ بیگ بشخ و پانٹ کرے۔
