اسلام آباد۔ 23جولائی (اے پی پی) بنجائی وزیر امور کشمیر و گلگت بلتستان علی امین خان گنڈاپور امریکی صدر ڈونلڈ ٹرمپ نا کنڈآن کشمیر نا ویل آ ثالثی نا پیش کش ءِ اسہ بھلو سرسہبی اس گوندسا پارینے کہ سفارتی محاذ آ دا سرسہبی عمران خان نا مخلصانہ سرکڑدہ ہی و سرسہب سفارت کاری نا سوب ممکن مسنے۔ سے شنبے نادے آ تینا اسہ بیان اسے ٹی اوپارے کہ ہراتم آن پاکستان تحریک انصاف نا حکومت برسر اقتدار بسنے ہمووخت آن پاکستان ءِ سارتی محاذ آ اسٹ آن پد ایلوسرسہبی ملنگ ءِ۔ بنجائی وزیر پارے کہ ہراوڑ ساڑی حکومت کشمیر نا ویل ءِ جہانی کہول آ تالان کرینے دُن ءُ مثال مستین اٹی کم ملک و ہر بروک آ دے اتون دا ویل آ جہانی کہول آ پاکستان نا مخ تفی ٹی پدریسہ ودکی مننگ ءِ۔ اوپارے کہ اینو ایل او سی نا ہڑتوم آ کنڈ ا رہینگوک آ کشمیریک ہم داہیت انا تائید ءِ کننگ ءُ کہ ساڑی حکومت اوفتا حق خود ارادیت و حق اکن توار گچین وڑاٹ دنیا نا غٹ فورم تیا چست کرینے۔ اوپارے کہ حکومت نا اسہ سال انا پدریسہ کوشست آتا ہی بھرم ءِ کہ امریکی صدر ہم دا متکن آ ویل آ ثالث نا کڑد ءِ ادا کننگ نا است خواہ نظر بننگ ءِ۔ علی امین گنڈاپور پارے کہ دامقبوضہ کشمیر نا غیور کشمیری تا جیرت لازوال قربانی و پاکستان نا سفارت کاری نا ہی بھرم ءِ کہ بھارت نا وزیراعظم نریندر مودی تینٹ امریکی صدر ءِ کشمیر نا ویل انا ایسری ٹی کڑد ادا کننگ کن درخواست کرے۔
