بنجائی وزیر تعلیم و کسبی تربیت و قومی تاریخ و ادبی میرات ڈویژن شفقت محمود نا نیشنل بک فاؤنڈیشن نا کنڈآن اڈ ہلوک آ دیوان آن تران

اسلام آباد۔ 23جولائی (اے پی پی) بنجائی وزیر تعلیم و کسبی تربیت و قومی تاریخ و ادبی میرات ڈویژن شفقت محمود پارینے کہ حکومت ملک اٹی کتاب بینی نا مون آ دننگ کن حکومت 10 ٹکی ایجنڈاغا کاریم کننگ ءِ ہراڑان اومیت ءِ کہ نئے بیرہ کتاب آتا مطالعہ ناکلچر ءِ شون ملک بلکن پبلشنگ نا ویل آک ہم ایسر مریرہ۔ داخیال آتا درشانی ءِ او نیشنل بک فاؤنڈیشن نا کنڈآن اڈ ہلوک آ خصوصی دیوان اٹی کرے ہراٹی لاہور نا پبلشر و بک سیلر آتا اسہ بھلو کچ اس ساڑی ئسر۔ دیوان اٹی سیکرٹری قومی تاریخ و ادبی میرات ڈویژن ڈاکٹر ندیم شفیق ملک و ایم ڈی این بی ایف ڈاکٹر انعام الحق جاوید ئسک ہم ساڑی ئسر۔ بنجائی وزیر تعلیم شفقت محمود پارے کہ دا 10 ٹکی ایجنڈاٹی بروک آ سال ءِ ایئر گوندنگ، تعلیمی ادارہ غاتے سہ ماہی بنداو تیا کتاب ہلنگ نا پابند کننگ، کتاب آتے براہ راست پبلشر آتیان ہلنگ و حکومتی کہول آ کتاب آتا دروشم اٹ ٹیکی تننگ نا کلچر ءِ مون آ دننگ، یوم اقبال نا مناسبت اٹ کتاب میلہ نا اڈتننگ، ایچ ای سی نا کمک اٹ پبلشنگ نا بابت نصابی کورس آتے جاری کننگ و پیشن نا ملک کتاب میلہ غاتے ٹی پاکستانی پبلشر آتا نمائندگی ٹی ودکی کننگ اوارے۔ سیکرٹری قومی تاریخ و ادبی میرات ڈویژن ڈاکٹر ندیم شفیق ملک باوری کرفے کہ ہر تُو ہندن ءُ سلابتی دیوان اس اڈتننگک ہراٹی کتاب آتا شینک کننگ نا بابت مون تروک ویل و اوفتا ایسری کن مروک آ پیش رفت آ ہیت کننگک، پبلشر آتا حق اکن حکومت نا کنڈآن زوت ہی قومی کتاب پالیسی اس ہم جوڑ کننگک۔ دیوان اٹی پبلشر و بک سیلر آک پرائیویٹ بک انڈسٹری نا بابت مچی ویل آتے ہم بیان کرے۔ داوخت آ بنجائی وزیر صحافی تا سوج آتا ہم ورندی تے تس۔