واشنگٹن۔ 22جولائی (اے پی پی) وزیراعظم عمران خان پارینے کہ ایران نا ویل آ مصالحت نا حق اٹی اُن، مصالحت کن تینا کڑد ءِ ادا کننگ کن تیار اُن، خواپنہ ایران و امریکہ نا نیام اٹ بے چیٹی ودے، امریکہ ایران جھیڑہ غان ڈیہہ نا امن و معیشت زہمی مننگ نا خلیس ءِ، مستین اٹی امریکہ وپاکستان اٹی بد اعتمادی نا سوب آن تعلقداری تے نسخان مس۔ بھارت تون گچین تعلقداری تا است خواہ اُن، پاکستانی سلہہ بند فوج کسبی و ہروڑنا چیلنج آتون مون تننگ نا لائخی تخک، پاکستان نا بے کچ جامع و موثر جوہری کمانڈ اینڈ کنٹرول سسٹم ساڑی ءِ، ایٹمی سلہہ غاک ہچ ءُ ویل اسے نا ایسری افس، امریکہ اسٹ انگا ملک ءِ ہرا پاکستان و بھارت نا نیام اٹ مصالحت کن کڑد ادا کننگ کیک، صدر ٹرمپ کشمیر نا ویل انا ایسری کن کڑد ادا کننگ خواہک، اوغان ویل ءِ سیاسی وڑاٹ ایسر کننگ مریک، اوغان طالبان ءِ حکومت نا بشخ مرسا الس نا نمائندگی بایدے ملے۔ صدر ٹرمپ اتون میٹنگ آن بھاز خوش اُٹ، صدر ٹرمپ ساف گو انسان اس لگا۔داخیال آتا درشانی ءِ او امریکی ٹی وی ”فوکس نیوز“ ءِ انٹرویو ترسا کرے۔ وزیراعظم عمران خان امریکہ و ایران بے چیٹی تا بابت پارے کہ خواپنہ ایران و امریکہ نا نیام اٹ بے چیٹیک ودر، امریکہ و ایران بے چیٹی آن پاکستان آ منفی زہم تمک۔
