وزیراعظم عمران خان تون پاک امریکہ بزنس کونسل نا ڈل انا اوڑدہی

واشنگٹن۔ 22جولائی (اے پی پی) وزیراعظم عمران خان تون پاک امریکہ بزنس کونسل نا ڈل ایگزیکٹو نائب صدر مائیرون بریلینٹ و امریکی چیمبر آف کامرس نا جہانی امور نا سروک دوشنبے نادے آ داڑے واشنگٹن ڈی سی ٹی پاکستانی سفارت خانہ ٹی اوڑدہی کریر۔ ڈل اٹی پاک امریکہ بزنس کونسل نا وائس چیئرمین ضیاء چشتی، پاک امریکہ بزنس کونسل نا صدر اسپیرانزا جیلالین و امریکہ نا پنی آ کمپنی پروکٹر اینڈ گیمبل بیئر، فیس بک، گوگل، کیرگل و ایلو فتا سینئر ایگزیکٹو آک ہم اوار ئسر۔ ڈل انا باسک آتون گپ و تران کرسا وزیراعظم عمران خان پاکستانی معیشت کن پاک امریکہ بزنس کونسل نا کمکاری نا ستاءِ کرے۔ وزیراعظم ڈل ءِ ملک اٹی زرکاری ءِ مون آ دننگ کن حکومتی گام گیج آتیان معلومدار کرے۔ وزیراعظم عمران خان پارے کہ کونسل نا باسک کمپنی پاکستان اٹی کاروبار ءِ ودفسا فائدہ دوئی کننگ کیک۔ مائیر ون بریلینٹ و ایلو ایگزیکٹو ز آک پاکستانی معیشت آ پبی پت انا درشانی ءِ کریر و اوفک معیشت اٹی گچینی کن حکومت ءِ کمک نا سلہ خلکر۔