واشنگٹن۔ 22جولائی (اے پی پی) وزیراعظم عمران خان تون خور و جان جوڑی نا بشخ آتا بابت زرکارآتا گروپ پاکستانی سفارت خانہ ٹی اوڑدہی کریر۔ اوڑدہی کروک آ ڈل اٹی اسلم خان، ٹیکساس آن مبشر چوہدری، ڈاکٹر باسط جاوید، ڈاکٹر عابد شیخ و ڈاکٹر مبشر چوہدری اوار ئسر۔ وزیر خارجہ شاہ محمود قریشی بحری امور نا وزیر سید علی حیدر زیدی، واپار کن وزیراعظم نا سلاہکار عبدالرزاق داؤد، وزیراعظم نا سلاہکار خزانہ ڈاکٹر عبدالحفیظ شیخ، سمندر پار پاکستانی تیکن وزیراعظم نا خصوصی کمکار ذوالفقار عباس بخاری ئسک ہم اوڑدہی ٹی ساڑی ئسر۔ زرکارآک پاکستان اٹی خور و جان جوڑی نا بشخ آتے ٹی گچینی و آسراتی فراوان کننگ کن تینا است خواہی نا درشانی ءِ کریر۔ اوفک پاکستان اٹی طبی آسراتی ءِ گچین کننگ خاص کر خلقی آ علاقہ و خاص انگا بشخ آتے ٹی طبی آسراتی تا فراوانی کن تینا سلاہ تے تسر۔ اوڑدہی ٹی دابارواٹ ہم گپ و تران کننگاکہ امریکہ ٹی رہینگوک آ پاکستان نژاد فزیشنز پاکستان اٹی رہینگوک آ کمیٹی تا ہراوڑ کمک ءِ کننگ کیرہ۔وزیراعظم عمران خان جان جوڑی نا بشخ اٹی پیش کروک آ سلاہ تا ستاءِ کرسا حکومت نا کنڈآن پاکستان اٹی معاشی و کاروباری وارخواہی تا ودفنگ و درملکی زرکارآتے کن گچین چاگڑد اس فراوان کننگ کن کوشست آتے تالان کرے۔ وزیراعظم پاکستان نژاد فزیشن آتا کڑد و پاکستان نا راجی و اقتصادی شونداری کن اوفتا عزم نا ستاءِ کرے۔
