اسلام آباد۔ 17 جولائی (اے پی پی) قومی احتساب بیورو نا چیئرمین جسٹس (ر) جاوید اقبال پارینے کہ نیب ”احتساب غٹ اکن“ نا پالیسی آ سختی اٹ عمل کننگ ءِ، میگا کرپشن نا مقدمہ غاتے ایسر اسکان سرکننگ نیب انا اولیت ءِ۔ داخیال آتا درشانی ءِ او چارشنبے نا دے آ نیب اناایگزیکٹو بورڈ انا دیوان آن تران کرسا کرے۔ دیوان اٹی ڈپٹی چیئرمین نیب، پراسیکوٹر جنرل اکاؤنٹیبلیٹی، ڈی جی آپریشن و ایلو سینئر آفیسر آک ساڑی ئسر۔ دیوان اٹی بدعنوانی نا چندی ریفرنس، انویسٹی گیشن و انکوائری تا منظوری ءِ تننگ نا گمان ءِ۔ چیئرمین نیب پارے کہ بدعنوانی اسہ ناسور اسے ہرا ملکی شونداری و شونہالی نا کسر اٹ غٹ آن بھلا اڑاند ءِ۔ نیب بدعنوان عنصر، اشتہاری و نروک دوبہ دار آتا مقدمہ غاتے کانود نا رداٹ ایسر اسکان سرکننگ کن غٹ وسیلہ غاتے کاریم اٹ اتنگ ءِ۔ اوپارے کہ نیب آفیسر آک ملک آن بدعنوانی نا چٹفنگ ءِ تینا قومی فرض سرپند کیرہ، ”نیب انا ایمان۔کرپشن فری پاکستان“ ءِ۔ اوپارے کہ نیب قوم انا پلوک آ 326ارب روپئی ءِ بدعنوان عنصر آتیان دوئی کرسا قومی خزانہ ٹی جمع کرفے ہراکہ اسہ بھلو سرسہبی اسے۔
