یورپین زرکارآک پاکستان اٹی زرکاری نا ودوک آ وارخواہی تیان فائدہ ہرفر
اسلام آباد۔ 17 جولائی (اے پی پی) وزیراعظم نا سلاہکار واپار عبدالرزاق داؤد یورپین زرکارآتے پارینے کہ او پاکستان اٹی ودوک آ زرکاری نا وارخواہی تیان فائدہ ہرفر، ساڑی حکومت پیشن نا زرکارآتے ہروڑنا آسراتی فراوان کننگ ءِ۔ داخیال آتا درشانی ءِ او چارشنبے نادے آ یورپی یونین نا سفیر جین فرینکوئس تون اوڑدہی ٹی کرے۔ اوڑدہی ٹی تین پہ تینی است خواہی نا معاملہ وپاکستان یورپی یونین نا تعلقداری تیا گپ و تران کننگا۔ سلاہکار واپار یورپی یونین نا سفیر ءِ پاکستان اٹی زرکاری نا وارخواہی تیان معلومدار کرے۔ اوپارے کہ ساڑی حکومت پیشن نا زرکار آتے ہروڑنا آسراتی تننگ ءِ۔ اوپارے کہ یورپین زرکارآک پاکستان اٹی زرکاری آن فائدہ ہرفر۔ داوخت آ یورپی یونین نا سفیر پارے کہ پاکستان تینا برآمدی مصنوعات آتا بابت ویلیو ایڈیشن آ چکار کے ہراڑان یورپ ءِ پاکستان نا برآمد آتے ٹی پین ودکی مننگ کیک۔ اوپارے کہ سلاہکار واپار یورپی یونین نا پارلیمنٹ نا دورہ ءِ کرسا پین وارخواہی تیان فائدہ ہرفر۔ پاکستان تینا برآمدی مصنوعات آتے ٹی پوسکن آ گڑاتے درستی راستی کرفسا برآمدآتے ودفنگ کیک۔ اوڑدہی ٹی ہڑتوم آ راہشون تا پاکستان یورپی یونین معاشی کمکاری آ است جمی نا درشان و دادے پین ودفنگ آ ہم امنا کریر۔
