اسلام آباد ۔ 16 جولائی (اے پی پی) مزن وزیر عمران خان ءَ گوشت کہ حکومت کاروبار ءِ تہ ءَ آسانی پیداک کنگ ءِ سر ءَ ھاسیں دلگوشی دیگ ءَ انت، سرمایہ کاری بورڈ ءُُ کاروبار ءِ ھوالگ ءَ وزارت سرمایہ کار آنی آسراتی ءِ واستہ مُدام کوشست کنگ ءَ انت، کاروباری برات استیں حکومت ءَ را کاروبار ی پڑ ءَ را دوستداروکیں سسا کنوک شوہاز ایت ۔ آئی ءَ اے گپ سئے شمبے ءِ روچ ءَ ادا ڈاکٹر محمود خان ءِ سروکی ءَ پو ایس پاکستان بزنس کونسل ءِ ڈل ءَ گوں گند ءُُ نند ءِ ساھت ءَ کت ۔ ڈل ءِ تہ ءَ پاکستان ءَ کار کنوکیں میاں اوستمانی پڑ ءِ مزن نا میں امریکی کمپنی آنی سروک ھوار اتنت ۔ گند ءُُ نند ءِ تہ ءَ وردن ءُُ وراک، ھاٹیگ، کشت ءُُ کشاری ءُُ ایندگر شوبگ آں گوں بندوکیں 28جتا جتائیں امریکی کمپنی (ایبٹ، سٹی بنک، ایگزان موبل، فیس بک، جنرل الیکٹرک، نیٹسول، پیپسی کو، پراکٹر اینڈ گیمبل، اوبر ءُُ دگہ بازیں ) آنی نماھندگ آں بھر زوری کت ۔ اے موہ ءِ سر ءَ مشیر ءِ ھزانگ ڈاکٹر عبدالحفیظ شیخ، مشیر تجارت عبدالرزاق داوءود، چیئرمین سرمایہ کاری بورڈ زبیر گیلانی ءُُ ایندگر کلانہ ایں اپسرگ ھم ساڑی اتنت ۔ چیئرمین یو ایس بزنس کونسل ڈاکٹر محمود خان ءَ پاکستنا ءَ کار کنوکیں جتا جتائیں امریکہ کمپنی آنی بابت ءَ سر پد کت ۔ بازیں کمپنی آنی سروک آں مزن وزیر ءَ را پاکستان ءَ وتی کاروباری چست ءُُ ایر ، تجارتی کساس ءُُ ملکی معیشت ءِ تہ ءَ وتی کرد ءِ بابت ءَ سرپد کت ۔ بھر زوروکیں مردم آں حکومتی پالیشی ھاسیں رنگ ءَ کاروباری تبک ءُُ سرمایہ کار آنی آسرواتی، کاروباری چست ءُُ ایر آنی رجسٹریشن ءِ کار ءُُ کاروباری تبک ءِ مردم آناں جوانیں موہ ءِ پجارینگ ءِ دل یکیمی کت ءُُ ملک ءَ کاروباری چست ءُُ ایر آناں گیش شاھیگان کنگ ءِ ٹونک کت ۔ مزن وزیر ءَ ڈل ءَ را وش اتک کنان ءَ گوشت کہ حکومت سرمایہ کار ءُُ کاروباری تبک ءِ مردم آنی ھمک رنگ ءِ آسراتی دیگ ءِ واستہ جزمیگ انت ۔
