کوءٹہ ۔ 16جولائی (اے پی پی) بلوچستان فوڈ اتھارٹی نا نالی تا دیر تیان دسوک آ سوزی تا برخلاف کریک ڈاءون برجاءِ، ڈائریکٹر جنرل بلوچستان فوڈ اتھارٹی میجر(ر) بشیر احمد نا کماشی ٹی بی ایف اے نا آپریشنل ٹیم دوشنبے نادے آ نوحصار نا علاقہ ٹی کارروائی کرسا بھلو ڈغار اسے آ دسوک آ سوزی تے تلف کرے، وخت اس کہ سیوریج نا گندہ انگا دیر ءِ ناکہ خلسا ہندا ڈغار تیان توننگا ۔ داوخت آ ڈی جی بلوچستان فوڈ اتھارٹی نا پاننگ ئس کہ کوءٹہ شار و اوڑتون ایب وکیب ایلو علاقہ غاتے ٹی سیوریج نا گندہ انگا دیر آن سوزی تا دسنگ اٹ خطرناک حد اسکان ودکی مسنے ہرانا سوب خلقت نا جان جوڑی زہمی مننگ ءِ ، اوپارے کہ طبی چاہندار آتا رداٹ گندہ انگا دیر آن دسوک آ سوزیک بِک آتا مرض، زردوئی، ٹائیفائیڈ و دست اتون اوار چندی خطرناک ناجوڑی تا سوب مننگ کیرہ ۔ اوپارے کہ سیوریج نا دیر آن سیراب کروک آ ڈغار تے کن کھد انا ضرورت مفک و ہنداسوب ءِ کہ ٹیوب ویل نا دیر انا جاگہ غا نالہ نا دیر ءِ اولیت تننگک ۔ ہرانا توننگ کن بلوچستان فوڈ اتھارٹی گندہ انگا دیر آن کھیت آتا سیرابی ءِ توننگ و الس ءِ رکھ و جان جوڑ افزا سوزی تا فراوانی ءِ المی کننگ کن خصوصی کریک ڈاءون نا فیصلہ ءِ کرے و داوخت اسکان مسہ جتا مرحلہ غاتے ٹی کوءٹہ شار تون اوار چندی علاقہ غاتے ٹی گندہ انگا دیر آن دسوک آ سوزی تے تلف کننگانے ۔
