21می صدی نا چیلنج آتا سرسہبی اٹ مقابلہ ءِ کننگ کن ورناتے آب اٹ تعلیم و تربیت فراوان کننگ بے حد المی و وخت انا اولیکو خواست ءِ، حکومت بلوچستان نا ترجمان لیاقت شاہوانی

کوءٹہ ۔ 16جولائی (اے پی پی) حکومت بلوچستان نا ترجمان لیاقت شاہوانی پارینے کہ 21می صدی سائنس وٹیکنالوجی نا صدی ءِ و 21می صدی نا چیلنج آتا سرسہبی اٹ مقابلہ ءِ کننگ کن ورناتے آب اٹ تعلیم و تربیت تننگ بھاز المی و وخت انا اولین خواست ءِ، حکومت بلوچستان قومی شونداری ٹی ورناتا کڑد ءِ امنا کرسا ہندن ءُ جامع یوتھ پالیسی اسے نا ٹہیفنگ ءِ حتمی شکل تسنے ہرانا رداٹ ہر ز ند انا بشخ اٹی ورناتے تینا لاءخی تے منفنگ کن پبی وارخواہی دوبریک، ہر ملک انا شونداری ٹی ورناتا کڑد کلیدی مریک ۔ داخیال آتا درشانی ءِ او دود آن تران کرسا کرے ۔ اوپارے کہ ورناتے واکدارکننگ آن بیدس شونداری و شونہالی نا ہدف آتے دوئی کننگ مفک و دارداٹ بیرہ آب اٹ تعلیم و ہیلکاری نا کمک اٹ ہی ورناتے واکدار کننگ مریک ۔ اوپارے کہ پاکستان اسہ خوش قسمت ءُ ملک اسے ہرانا 60 درسد آبادی ورناتیا تالان ءِ ، ہرافتے آب اٹ تعلیم ، سکل ڈویلپمنٹ و ایلو فنی علم آن آراستہ کرسا تینا نت تیا سلفنگ مریک ۔ اوپارے کہ ورناتے واکدار کننگ ننا اولیت آتے ٹی اوارے و ساڑی حکومت تون اوار ہر حکومت نا فرض ءِ کہ ورناتے اوفتا حق فراوان کننگ و واکدار کننگ کن وسیلہ فراوان کے ۔ اوپارے کہ ورناتے واکدار کننگ کن سکل ڈویلپمنٹ نا بشخ اٹی بے پناہ گنجائش ارے، ہنداخاطران سکل ڈویلپمنٹ نا سیکٹر اٹی ورناتا زیات آن زیات کھپت کن انفرادیت و جدت اتون مون آ بروئی مریک ۔ اوپارے کہ بلوچستان نا ورناک بے کچ لاءخ، ذہین و پبی اہلیت تخرہ، ہرا زند انا ہر بشخ اٹی تینا لاءخی تیان ملک انا پن ءِ روشن کرینو ملک صوبہ و قوم ءِ تینا دا لاءخ انگا ورناتتون بھاز انگا اومیت آک وابستہ ءُ ۔ صوبائی حکومت ورناتا لاءخی تے پین زیات کننگ و شونداری نا وارخواہی تیان پبی فائدہ ہرفنگ کن یوتھ اسکل ڈویلپمنٹ پروگرام تون اوار چندی پروگرام تشکیل تسنے خاص کر تعلیم نا بشخ اٹی کوالٹی و پٹ وپول کن خصوصی پروگرام جوڑ کننگ انگ ءِ صوبائی حکومت نا کنڈآن تعلیم ءِ مون آ دننگ نا دا پروگرام تیا عملدرآمد نا سوب بلوچستان نا ورناتے ملکی و جہانی کہول آ آب اٹ تعلیم نا گچین وارخواہی دوبننگ کیک و بلوچستان نا ورناک ہم ملک و قوم انا تعمیر و ترقی کن شون ہلوک صوبہ غاتا ورناتا ہم گام مرسا تینا مثبت کڑد ءِ ادا کننگ کیرہ، آب اٹ تعلیم و اسکلز ڈویلپمنٹ نا است بڈی کن حکومت بلوچستان ورناتے تون ہروڑنا کمکاری و گچین کسبی راہشونی ءِ المی کیک ۔