اسلام آباد ۔ 16جولائی (اے پی پی) صدر مملکت ڈاکٹرعارف علوی پارینے کہ پاکستان و یورپی یونین نا نیام اٹ واپار نا ساڑی آ کچ اونا حقی لاءخی تون ہم گرنچ اف، دادے پین مون آ دننگ نا گرج ءِ ، پاکستان ’’جی ایس پی پلس‘‘ اسکیم ءِ تینا معیشت نا گچینی و اقتصادی ایجنڈا ءِ مون آ ودفنگ کن جوڑ جاڑی رابطہ تصور کیک ۔ اوداہیت ءِ سے شنبے نادے آ یورپی یونین نا دز کش مروک آ سفیر جین فرینکوئس کوتین تون گپ و تران کرسا پارے ہرا ایوان صدر اٹی اوڑتون اوڑدہی کرے ۔ صدر مملکت دزکش مروک آسفیر ءِ پاکستان اٹی مد انا سرسہب پوروی آ مبارکبادی ترسا پاکستان و یورپی یونین نا نیام اٹ تعلقداری تے مون آ دننگ کن اونا کوشست آتا ستاءِ کرے ۔ اوپارے کہ پاکستان یورپی یونین تون تعلقداری تے بھاز قدر انا نظر اٹ ہرک ہرا کمکاری نا غٹ بشخ آتے ٹی مثبت سمت اٹ روان ءِ ۔ ڈاکٹر عارف علوی خلقی شونداری، قدرتی وسیلہ غاتا بست و بند، تعلیم و انسانی وسیلہ غاتا شونداری نا بشخ آتے ٹی شونداری ڈٹ آتے کن یورپی یونین نا کمکاری نا ہم ستاءِ کرے ۔ سفیر مہمان نوازی و پاکستان اٹی اونا خوشگوار قیام کن حکومت و الس نا منت واری ءِ ہرفے ۔ اودہشت نا لعنت نا انسداد کن پاکستان نا قربانی تا ہم ستاءِ کرے ۔ صدر مملکت دزکش مروک آ سفیر کن نیک است خواہی تا درشانی ءِ کرے ۔
