اسلام آباد ۔ 16جولائی (اے پی پی) بھارتی اخبار ٹائمز آف انڈیا تینا سرحال اٹی نوشتہ کرینے کہ وزیراعظم عمران خان نا سرسہب خارجہ پالیسی نا سوب آن بھارت اوغان امن عمل اٹی اسہ کنڈ مننگ آ بیوس مسنے، اوغانستان اٹی ارب آ ڈالر نا زرکاری آن پد ہم اوغان امن عمل اٹ بھارت نا ہچ ءُ کڑد اس اف، اوغان امن عمل اٹ پاکستان مرکزی ءُ حیثیت اس اختیار کرے ہرانا ہندوستانی میڈیا کل انا مون آ اعتراف ءِ کننگ ءِ ۔ اوغان امن عمل آن بھارت نا اسل پیشن پیش تمنگ آ بھارتی میڈیا تین آ توسنے ، ٹائمز آف انڈیا اوغان امن عمل اٹ پاکستان نا مرکزی کڑد و بھارت نا پورو اخراج آ سرجم ءُ سرحال اس نوشتہ کرینے کہ پاکستان بھارت ءِ پورو اوغان امن عمل آن کشسا پیشن کرینے، پاکستان روس، چین و امریکہ تون مچ آ عمل نا مرکزی اسٹیج آ تولوک ءِ، بھاز انگا فائدہ غاتیان پد ہم بھارت نا وجود ءِ پورو وڑاٹ گوجالنگا ۔ سرحال اٹی پین نوشتہ کننگانے کہ مچ آ اوغان امن عمل اٹ بھارت خننگک نئے اوناگڑتی تا جاگہ اس نشان اس ملک ۔ اخبار نوشتہ کرینے کہ امریکی وزیر خارجہ نا نئی دہلی آ بننگ نا وخت آ بھارت تینا گڑتی تا درشانی ءِ کرے، بھارت اوغان امن عمل کن امریکہ نا خصوصی نمائندہ زلمے خلیل زاد و روسی کمامدارآتا مون آ ہم تینا نکتہ نظر ءِ پیش کرے ولے اوفک داڑا ہچ ءُ ردعمل اس نشان تتور، تدوک آ 18 سال اٹی بھارت سرکار اوغانستان اٹی بھلو زرکاری اس کرے ۔ اخبار مستی نوشتہ کرینے کہ پاکستان حالیت آتیان پورو است جم و پورو وڑٹ خوش خننگ انگ ءِ ، امریکہ و اونا سیوتی سعودی عرب، امارات و قطر پاکستان نا پبی امداد ءِ کننگ ءُ ۔ اخبار مستی نوشتہ کرینے کہ پین تو پین آئی ایم ایف ہم پاکستان کن امدادی پیکج اس جاری کرینے و داخس آخابلکن امریکی صدر بروک آ ہفتہ پاکستانی وزیراعظم عمران خان نا واشنگٹن دورہ نا وخت آ پبی بیابخیری نا تیاری تیٹی اختہ ءِ ۔
