چیئرمین سینیٹ محمد صادق سنجرانی تون اسپیکر قومی اسمبلی اسد قیصر نا اوڑدہی

اسلام آباد ۔ 15جولائی (اے پی پی) چیئرمین سینیٹ محمد صادق سنجرانی تون اسپیکر قومی اسمبلی اسد قیصر دوشنبے نادے آ اونا چیمبر اٹی اوڑدہی کرے و اہم سیاسی و پارلیمانی معاملہ غاتون اوار اوار ہڑتوم آ ایوان تا نیام اٹ گچین رابطہ کاری و کمکاری آ سرجم گپ و تران کریر ۔ اوڑدہی ٹی قائد ایوان سینیٹ سینیٹر سید شبلی فراز ہم ساڑی ئس ۔ داوخت آ چیئرمین سینیٹ گپ و تران کرسا پارے کہ ہڑتوم آ ایوان تا نیام اٹ تین پہ تینی کمکاری نا کمک اٹ کانود سازی و پارلیمانی معاملہ ءِ جوان وڑاٹ چلیفنگ انگ ءِ ۔ اوپارے کہ کانود سازی نا عمل ءِ پین گچین کننگ کن دا شریداری ءِ پین سوگو کننگک ۔ چیئرمین سینیٹ پارے کہ قومی اسمبلی نا کنڈآن آئینی امور نا بابت مدام پبی کمک دوئی مسنے و ایوان بالا ہم معاملہ غاتا گچینی کن مدام مثبت کڑد ادا کرینے ۔ اسپیکر قومی اسمبلی اسد قیصر ہم ہڑتوم آ ایوان تا نیام اٹ کمکاری ءِ پین گچین کننگ نا گرج آ زور شاغا ۔ اوپارے کہ اپوزیشن جماعت آک ایوان بالا نا عزت و شرف نا بایدے خیال ءِ تخر و بے پت انگا گڑاتیان بایدے پاناد کروسر انتئے کہ ایوان بالا بنجا نا علامت ءِ ہراٹی ہر چار آ صوبہ غاتے اسہ وڑ نمائندگی دوئی ءِ و غٹ سیاسی جماعت آتے ملک اٹی جمہوریت نا مون آ دننگ کن نئے بیرہ گام گیج ہلوئی مرے بلکن افہام و تفہیم آن ملک انا ویل آتا ایسری کن گچین ڈٹ بندی کروئی مرے ۔ اوپارے کہ جمہوری عمل آن ہی ملک شون ہلیک و جمہوری عمل ءِ مون آ دننگ کن غٹ سیاسی جماعت آتا کمک المی ءِ ۔