اسلام آباد ۔ 15جولائی (اے پی پی) وزیراعلیٰ پنجاب عثمان بزدار چیئرمین سینیٹ محمد صادق سنجرانی تون دوشنبے نادے آ پارلیمنٹ ہاءوس اٹی اوڑدہی کرے و صوبہ ٹی جاری شونداری عمل و اہم ملکی معاملہ غاتیا گپ و تران کریر ۔ داوخت آ گپ و تران کرسا چیئرمین سینیٹ محمد صادق سنجرانی پارے کہ ایوان بالا بنجا نا علامت ءِ و دا ایوان صوبائی اکائی تا گچین وڑاٹ توار ءِ چست کرسا کیک تانکہ راج انا پسماندہ تپہ غاتے شونداری نا مرکزی دنگ اٹ اتنگ مرے ۔ اوپارے کہ ننا ویل آتا ایسری جمہوریت اٹی اودیم ءِ ، جمہوری عمل نا تسلسل کن ننے غٹ ءِ کڑد ادا کروئی مریک ۔ وزیراعلیٰ پنجاب چیئرمین سینیٹ ءِ پنجاب نا شونداری ڈٹ آتون اوار اوار راجی شونداری کن کروک آ گام گیج آتیان معلومدار کرے ۔ چیئرمین سینیٹ دا وخت آ پارے کہ ایوان بالا صوبائی اکائی تا شونداری و راج انا پسماندہ تپہ غاتا حق انا رکھ اکن پبی متاماری کننگ ءِ، دابابت صوبائی حکومت آتے ہروڑکمک فراوان کننگک ۔ اوپارے کہ ملکی شونداری کن بنجا و جتا صوبہ غاتا نیام اٹ ہم گرنچی وخت انا گرج ءِ و ایوان بالا دا دا بابت تینا کلیدی کڑد ءِ ادا کرسا کیک ۔
